September 29, 2019
September 29, 2019
ദോഹ: വിദ്യാഭ്യാസ പുരോഗതിയും ഉത്തമ രാഷ്ട്രീയവും ലക്ഷ്യമാക്കി പ്രവർത്തിച്ച സി.എച്ച് മുഹമ്മദ് കോയ നാടിനെയും സമുദായത്തെയും പുരോഗതിയിലേക്ക് നയിച്ച ബഹുമുഖ പ്രതിഭയായിരുന്നുവെന്ന് പ്രമുഖ പ്രഭാഷകനും മുസ്ലിം ലീഗ് ദേശീയ നിർവാഹക സമിതി അംഗവുമായ ഷാഫി ചാലിയം അഭിപ്രായപ്പെട്ടു.ഖത്തർ - കെ.എം.സി.സി കോഴിക്കോട് ജില്ലാകമ്മിറ്റി ദോഹയിൽ സംഘടിപ്പിച്ച സി.എച്ച് അനുസ്മരണ പരിപാടിയിൽ സംസാരിക്കുകയായിരുന്നു അദ്ദേഹം.
കേരളത്തിൽ മുസ്ലിം ലീഗ് പ്രസ്ഥാനം വിദ്യാഭ്യാസ രംഗത്ത് ഉണ്ടാക്കിയ വിപ്ലവകരമായ മാറ്റത്തിന് നേതൃത്വം നൽകിയവരിൽ പ്രധാനി സി.എച്ച് ആയിരുന്നു.
1967 മുതൽ പിന്തുടർന്നു വന്ന അധ്യാപന-ബോധന വ്യവസ്ഥകളിൽ കാര്യമായ പൊളിച്ചെഴുത്തുകൾ നടത്താൻ വിദ്യാഭ്യാസ മന്ത്രിയായിരിക്കെ സി.എച്ചിന് കഴിഞ്ഞു. പരമ്പരാഗത അതിർവരമ്പുകൾ മറികടന്ന് പാർശ്വവത്കരിക്കപ്പെട്ട വിഭാഗങ്ങളെ മുഖ്യധാരയിലേക്ക് കൈപിടിച്ചുയർത്തിയ ധീരനായ ഭരണാധികാരിയായിരുന്നു സി.എച്ചെന്നും അദ്ദേഹം അനുസ്മരിച്ചു.ന്യുനപക്ഷ സമൂഹത്തോട് അൽപം സൗമനസ്യം കാണിച്ചതിന്റെ പേരിൽ വർഗീയവാദികളിൽ നിന്ന് കടുത്ത വിമർശനങ്ങൾ ഏറ്റുവാങ്ങേണ്ടി വന്ന നേതാവ് കൂടിയായിരുന്നു സി.എച്ചെന്നും ഷാഫി ചാലിയം അഭിപ്രായപ്പെട്ടു.
