March 12, 2022
March 12, 2022
ദോഹ : ഖത്തറിൽ വാഹനങ്ങളുടെ നമ്പർ പ്ലേറ്റ് നടപടിക്രമങ്ങൾ ഇനി വേഗത്തിൽ പൂർത്തിയാവും. ഇൻഡസ്ട്രിയൽ ഏരിയയിലുള്ള നമ്പർ പ്ലേറ്റ് നിർമാണ യൂണിറ്റിൽ, മെട്രാഷ് 2 ഉപഭോക്താക്കൾക്കായി പ്രത്യേകം ലൈൻ ആരംഭിച്ചതായി അധികൃതർ അറിയിച്ചു. ട്രാഫിക്ക് ലൈസൻസിങ് ഡിപ്പാർട്ട്മെന്റിലെ ജനറൽ ഡയറക്ടറേറ്റ് ആണ് പദ്ധതി നടപ്പിലാക്കുന്നത്. രാവിലെ 6.30 മുതൽ വൈകീട്ട് 7 മണി വരെ ഈ സേവനം ലഭിക്കും.
നമ്പർ പ്ലേറ്റിന്റെ പണം അടക്കാനുള്ള സൗകര്യം മെട്രാഷ് 2 ആപ്പിൽ ഒരുക്കും. ഇതോടെ, പണമടക്കാൻ ഏറെ നേരം വരിയിൽ നിൽക്കേണ്ട സാഹചര്യം ഒഴിവാക്കാൻ ഉപഭോക്താക്കൾക്ക് കഴിയും. വെരിഫിക്കേഷൻ കൗണ്ടറിൽ രേഖകൾ കാണിച്ച ശേഷം, നേരെ നമ്പർ പ്ലേറ്റ് സ്ഥാപിക്കാനുള്ള നടപടികളിലേക്ക് കടക്കാൻ കഴിയും. ഖത്തർ ടെലിവിഷനോട് സംസാരിക്കവെ ട്രാഫിക്ക് ഉദ്യോഗസ്ഥനായ അൽ റുമൈഹിയാണ് ഇതുസംബന്ധിച്ചുള്ള വിവരങ്ങൾ പുറത്തുവിട്ടത്. മെട്രാഷ് ആപ്പ് ഉപഭോക്താക്കൾക്കുള്ള പ്രത്യേക ലൈൻ അടക്കം, ആകെ നാല് വരികളാണ് ഇൻഡസ്ട്രിയൽ ഏരിയയിലെ നമ്പർ പ്ലേറ്റ് കേന്ദ്രത്തിൽ ഉള്ളത്. പുതിയ നമ്പർ പ്ലേറ്റ് സ്ഥാപിക്കുന്നതിനൊപ്പം, പഴകിയ നമ്പർ പ്ലേറ്റുകൾ മാറ്റാനുള്ള സംവിധാനവും ഇവിടെ ഒരുക്കിയിട്ടുണ്ട്.
