January 25, 2022
January 25, 2022
ദോഹ : ദോഹ രാജ്യാന്തര വിമാനത്താവളത്തിൽ വിവിധ നിരക്കുകളിൽ മാറ്റം വരുത്തിയതായി ഖത്തർ സിവിൽ ഏവിയേഷൻ അതോറിറ്റി അറിയിച്ചു. ട്രാവൽ ഏജന്റുകൾക്ക് അയച്ച സർക്കുലറിലാണ് ഇക്കാര്യം പറയുന്നത്. നിലവിൽ യാത്രക്കാർക്കുള്ള ഫീസുകൾ വർധിപ്പിച്ചതിനൊപ്പം, സർവീസ് ചാർജ് ഉൾപ്പെടുത്തുകയും ചെയ്തിട്ടുണ്ട്. ഏപ്രിൽ ഒന്ന് മുതലാണ് പുതിയ സർക്കുലർ പ്രാബല്യത്തിൽ വരികയെങ്കിലും, ഫെബ്രുവരി ഒന്ന് മുതൽ ബുക്ക് ചെയ്യുന്ന ടിക്കറ്റുകൾക്ക് പുതിയ നിരക്ക് ബാധകമാണെന്ന് അതോറിറ്റി വ്യക്തമാക്കി.
24 മണിക്കൂർ വരെയുള്ള ട്രാൻസിറ്റ് അടക്കം, ഖത്തറിൽ നിന്ന് പുറപ്പെടുന്ന ഓരോ യാത്രക്കാരനും എയർപോർട്ട് ഡെവലപ്മെന്റ് ഫീസ്, പാസഞ്ചർ ഫെസിലിറ്റി ഫീസ് എന്നീ ഇനങ്ങളിലായി 60 റിയാൽ വീതം നൽകണം. യാത്രക്കാരന്റെ സുരക്ഷ ഉറപ്പുവരുത്താനായി 10 റിയാലും ഫീസിനത്തിൽ നൽകണം. രണ്ട് വയസിൽ താഴെയുള്ള, സീറ്റ് ആവശ്യമില്ലാത്ത കൈക്കുഞ്ഞുങ്ങൾ, യാത്രയുമായി ബന്ധപ്പെട്ട് ഡ്യൂട്ടിയിൽ ഉള്ള ഫ്ലൈറ്റ് ക്രൂ, സാങ്കേതിക തകരാറുകൾ മൂലമോ മറ്റ് കാരണങ്ങളാലോ വേറെ വിമാനത്തിൽ യാത്ര ചെയ്യാൻ നിർബന്ധിതരായവർ എന്നിവർക്ക് മുകളിൽ പറഞ്ഞ ഫീസുകളിൽ ഇളവ് ലഭിക്കും. ഓരോ എയർ കാർഗോ ഷിപ്പ്മെന്റിനും മെട്രിക്ക് ടണ്ണിന് പത്ത് റിയാൽ വീതം ഫീസ് നൽകണമെന്നും അതോറിറ്റി വ്യക്തമാക്കി.
