November 16, 2020
November 16, 2020
ദോഹ : ഖത്തറിൽ കൊറോണ വൈറസ് വ്യാപനം തടയാൻ ലക്ഷ്യമാക്കി വിവിധ തലത്തിലുള്ള സ്‌കൂള്‍ വിദ്യാര്‍ത്ഥികള്‍ക്കിടയിൽ ബോധവല്‍ക്കരണ കാമ്പയിൻ തുടങ്ങുമെന്ന് നാഷണല്‍ ഹ്യൂമന്‍ റൈറ്റ്‌സ് കമ്മിറ്റി (എന്‍.എച്ച്.ആര്‍.സി) അറിയിച്ചു. ആദ്യഘട്ടത്തില്‍ ഖത്തര്‍ അക്കാദമി ദോഹയുടെ സ്‌കൂളുകളിലാണ് ക്യാമ്പെയിന്‍ നടത്തുക.
വിദ്യാര്‍ത്ഥികള്‍ക്കിടയില്‍ കൊറോണ വൈറസ് വ്യാപിക്കുന്നത് നിയന്ത്രിക്കാനായി എന്‍.എച്ച്.ആര്‍.സി ആസൂത്രണം ചെയ്ത പദ്ധതികളുടെ ഭാഗമായാണ് ആരോഗ്യസുരക്ഷാ കാമ്പയിൻ നടത്തുന്നതെന്ന് എന്‍.എച്ച്.ആര്‍.സിയുടെ പബ്ലിക് റിലേഷന്‍സ് ആന്‍ഡ് മീഡിയ യൂണിറ്റ് മേധാവി അബ്ദുള്ള അലി അല്‍-മഹ്മൂദ് പറഞ്ഞു. ആരോഗ്യ മന്ത്രാലയവും വിദ്യാഭ്യാസ മന്ത്രാലയവും നിഷ്‌കര്‍ഷിക്കുന്ന മുന്‍കരുതലുകള്‍ സ്വീകരിച്ചുകൊണ്ട് കൊണ്ട് വിദ്യാര്‍ത്ഥികള്‍ നിര്‍ബന്ധമായും കാമ്പയിനിൽ പങ്കെടുക്കണമെന്നും അദ്ദേഹം ആവശ്യപ്പെട്ടു.
ബ്രോഷറുകള്‍, കളറിങ് പുസ്തകങ്ങള്‍, ഷോര്‍ട്ട് ഫിലിമുകള്‍ തുടങ്ങി ഓരോ തലത്തിലുമുള്ള വിദ്യാര്‍ത്ഥികള്‍ക്കായി വൈവിധ്യമായ മാര്‍ഗങ്ങള്‍ ഉപയോഗിച്ചാണ് കാമ്പയിൻ നടത്തുക. സ്വയം സുരക്ഷിതരായിരിക്കുന്നതിനൊപ്പം കുടുംബത്തെയും സുരക്ഷിതമാക്കാന്‍ സ്‌കൂള്‍ വിദ്യാര്‍ത്ഥികള്‍ ശ്രദ്ധിക്കേണ്ടതിന്റെ ആവശ്യകതയും അബ്ദുള്ള അലി അല്‍-മഹ്മൂദ് ഓർമിപ്പിച്ചു.
രാജ്യത്തെ എല്ലാ സ്‌കൂളുകളിലെയും എല്ലാ തലത്തിലുമുള്ള വിദ്യാര്‍ത്ഥികളിലും എത്തുന്നത് വരെ എന്‍.എച്ച്.ആര്‍.സി ഈ ബോധവല്‍ക്കരണ കാമ്പയിൻ തുടരും. സ്‌കൂളുകളുമായി സഹകരിച്ചാണ് പരിപാടി സംഘടിപ്പിക്കുകയെന്നും അദ്ദേഹം കൂട്ടിച്ചേര്‍ത്തു.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക.
