March 28, 2022
March 28, 2022
ദോഹ : ഫ്രീ സ്റ്റൈൽ ഫുട്ബോളിലെ പ്രകടനമികവിലൂടെ മലയാളികളുടെ മനംകവർന്ന ഹാദിയ ഹക്കീമിന് അന്താരാഷ്ട്ര അംഗീകാരം. ലോകകപ്പിന് മുന്നോടിയായി സുപ്രീം കമ്മിറ്റി സംഘടിപ്പിക്കുന്ന ഇൻഫ്ലുവെൻസർ കപ്പിൽ ഹാദിയയും ഇടംനേടി. ഏഷ്യയെ പ്രതിനിധീകരിച്ചാണ് കോഴിക്കോട് ചേന്ദമംഗല്ലൂർ സ്വദേശിനിയായ ഹാദിയ ടൂർണമെന്റിൽ ഇറങ്ങുക. ഏഴ് പേരുള്ള ഏഷ്യൻ ടീമിൽ ഹാദിയയെ കൂടാതെ ഒരിന്ത്യക്കാരനാണുള്ളത്.
ചെറുപ്പം മുതൽ ഫുട്‍ബോളിനെ അഗാധമായി സ്നേഹിച്ച ഹാദിയ, 2020 ൽ നടത്തിയ ഒരു ഫ്രീസ്റ്റൈൽ പ്രകടനത്തിലൂടെയാണ് സമൂഹമാധ്യമങ്ങളിലൂടെ തരംഗമായി മാറിയത്. പിന്നാലെ നിരവധി ടൂർണമെന്റുകളിൽ പങ്കെടുത്ത ഹാദിയ അനേകം സമ്മാനങ്ങളും സ്വന്തമാക്കിയിട്ടുണ്ട്. ഹാദിയയുടെ സഹോദരൻ ഹിഷാം ഹക്കീമിന്, ഇറ്റാലിയൻ ടീമായ എസി മിലാൻ ഇന്ത്യയിൽ നടത്തുന്ന അക്കാദമിയിൽ പരിശീലകസ്ഥാനം ലഭിച്ചിരുന്നു. ഖത്തർ പെട്രോളിയം ജീവനക്കാരനായിരുന്ന അബ്ദുൾ ഹക്കീമാണ് പിതാവ്. രണ്ട് ദിവസങ്ങളിലായി നടക്കുന്ന ടൂർണമെന്റിൽ പങ്കെടുക്കാൻ ഹാദിയ ഇന്ന് ദോഹയിൽ പറന്നിറങ്ങി.
