November 20, 2021
November 20, 2021
ഗോവ : ഇന്ത്യൻ സൂപ്പർ ലീഗ് 2021-2022 സീസണിന്റെ ഉദ്ഘാടനമത്സരത്തിനിറങ്ങിയ കേരളാ ബ്ലാസ്റ്റേഴ്സിന് തോൽവി. ഗോൾമഴ പെയ്ത മത്സരത്തിൽ രണ്ടിനെതിരെ നാല് ഗോളുകൾക്കാണ് എടികെ മോഹൻ ബഗാൻ കേരളത്തെ മറികടന്നത്. സൂപ്പർ താരം ഹ്യൂഗോ ബൗമാസിന്റെ ഇരട്ടഗോളുകളാണ് കൊൽക്കത്തൻ ടീമിന്റെ വിജയം എളുപ്പമാക്കിയത്.
മത്സരത്തിന്റെ രണ്ടാം മിനിറ്റിൽ തന്നെ ബൗമാസ് എടികെയെ മുന്നിലെത്തിച്ചു. മലയാളി താരം സഹലിന്റെ ഗോളിലൂടെ ബ്ലാസ്റ്റേഴ്‌സ് ഒപ്പമെത്തിയെങ്കിലും, കൊൽക്കത്തയ്ക്കനുകൂലമായി ലഭിച്ച പെനാൽറ്റി ലക്ഷ്യത്തിലെത്തിച്ച റോയ് കൃഷ്ണ ടീമിനെ മുന്നിലെത്തിച്ചു. അധികം വൈകാതെ ബൗമാസ് രണ്ടാം ഗോളും നേടിയതോടെ ആദ്യപകുതിയിൽ കൊൽക്കത്ത ഒന്നിനെതിരെ മൂന്ന് ഗോളുകളുടെ ലീഡ് നേടി. അൻപതാം മിനിറ്റിൽ കൊളാക്കോയും വലകുലുക്കിയതോടെ എടികെ വിജയം ഉറപ്പിക്കുകയായിരുന്നു. 69ആം മിനിറ്റിൽ പെരേര ഡിയാസിലൂടെയാണ് കേരളം രണ്ടാം ഗോൾ നേടിയത്. അടുത്ത മത്സരത്തിൽ നോർത്ത് ഈസ്റ്റ് യുണൈറ്റഡാണ് ബ്ലാസ്റ്റേഴ്‌സിന്റെ എതിരാളികൾ. ഇന്നത്തെ കളിയിൽ ബെംഗളൂരുവും നോർത്ത് ഈസ്റ്റ് യുണൈറ്റഡും ഏറ്റുമുട്ടും.
