August 21, 2021
August 21, 2021
ദോഹ : ഇന്ത്യൻ വിദേശകാര്യമന്ത്രി എസ് ജയശങ്കറും ഖത്തർ വിദേശകാര്യ മന്ത്രി ഷെയ്ഖ് മുഹമ്മദ് ബിൻ അബ്ദുറഹ്മാൻ അൽതാനിയും ദോഹയിൽ കൂടിക്കാഴ്ച നടത്തി. അഫ്ഗാനിലെ സംഭവവികാസങ്ങളുടെ പശ്ചാത്തലത്തിൽ, അമേരിക്കയിൽ നിന്നും അടിയന്തിരമായി നാട്ടിലേക്ക് മടങ്ങിയ മന്ത്രി യാത്രക്കിടെ ദോഹ സന്ദർശിക്കുകയായിരുന്നു. ട്വിറ്ററിലൂടെ മന്ത്രി തന്നെയാണ് കൂടിക്കാഴ്ചയുടെ വിവരം പുറത്തുവിട്ടത്.
അഫ്ഗാൻ വിഷയത്തിൽ ചില നിർണ്ണായക തീരുമാനങ്ങൾ എടുത്തുവെന്ന സൂചന നൽകിയെങ്കിലും, അവ എന്തൊക്കെ ആണെന്ന് മന്ത്രി വെളിപ്പെടുത്തിയില്ല. 2013 മുതൽ താലിബാന്റെ ചർച്ചകൾക്ക് ഖത്തർ ചുക്കാൻപിടിക്കാറുള്ളതിനാൽ ഇരുരാജ്യങ്ങളും പ്രതീക്ഷയോടെ ആണ് കൂടിക്കാഴ്ചയെ നോക്കിക്കണ്ടത്. അഫ്ഗാനിൽ നിന്നും അമേരിക്കൻ സേന പിന്മാറിയതിലും ഖത്തർ ചെറുതല്ലാത്ത പങ്ക് വഹിച്ചിരുന്നു. ഇന്ത്യയുടെ ചിരവൈരികളായ പാകിസ്താനുമായി താലിബാന് അടുപ്പമുള്ളതിനാൽ, ഖത്തറിന്റെ നിലപാടുകൾ ഈ വിഷയത്തിൽ ഇന്ത്യക്ക് നിർണ്ണായകമായേക്കും.