March 02, 2022
March 02, 2022
ദോഹ : വാഹനങ്ങളിൽ അധികൃതരുടെ മുൻ‌കൂർ അനുമതിയില്ലാതെ മാറ്റങ്ങൾ വരുത്തിയാൽ കനത്ത പിഴ ഈടാക്കുമെന്ന് ട്രാഫിക് ജനറൽ ഡയറക്ടറേറ്റ് അറിയിച്ചു. വാഹനത്തിന്റെ നിറം മാറ്റുക, നമ്പർ പ്ലേറ്റുകളുടെ വലിപ്പവും രൂപവും മാറ്റുക, അനുമതി ഇല്ലാതെ വാഹനങ്ങൾ പരസ്പരം മാറുകയോ ലോണിൽ നൽകുകയോ ചെയ്യുക മുതലായ നിയമലംഘനങ്ങൾക്കാണ് പിഴ ഈടാക്കുകയെന്ന് ട്രാഫിക് ഡയറക്ടറേറ്റ് ഉദ്യോഗസ്ഥൻ ക്യാപ്റ്റൻ മുഹമ്മദ്‌ അബ്ദുള്ള അൽ കുവാരി വിശദമാക്കി.
ആഭ്യന്തര മന്ത്രാലയത്തിന്റെ സഹകരണത്തോടെ സംഘടിപ്പിച്ച പ്രത്യേക വെബിനാറിലാണ് അൽ കുവാരി നിയമവശങ്ങൾ വ്യക്തമാക്കിയത്. മദ്യപിച്ച് വാഹനമോടിക്കുക, അപകടങ്ങൾ ഉണ്ടായാൽ വാഹനവുമായി കടന്നുകളയാൻ ശ്രമിക്കുക തുടങ്ങിയ കുറ്റകൃത്യങ്ങൾക്ക് പിഴക്ക് പുറമെ ജയിൽ ശിക്ഷയും ലഭിക്കും. റോഡിന് സമീപത്തായി, വാഹനങ്ങൾക്ക് അപകടം ഉണ്ടാക്കുന്ന തരത്തിൽ അനധികൃത നിർമാണങ്ങൾ നടത്തിയാൽ ഒരുമാസം തടവ് ശിക്ഷയും, ഒപ്പം 10000 മുതൽ 15000 റിയാൽ വരെ പിഴയും ലഭിക്കും. ഒരേ കുറ്റകൃത്യം ആവർത്തിച്ചാൽ ശിക്ഷ ഇരട്ടിക്കുമെന്നും കുവാരി കൂട്ടിച്ചേർത്തു. ലൈസൻസ് ഇല്ലാതെ വാഹനം ഓടിക്കരുതെന്നും, ലൈസൻസില്ലാത്തവർക്ക് വാഹനം ഓടിക്കാൻ നൽകരുത് എന്നും കുവാരി നിർദ്ദേശിച്ചു.
