October 26, 2019
October 26, 2019
ദോഹ : ജി.സി.സിയിലെ എഴുത്തുകാർക്കായി ഖത്തർ സംസ്കൃതി ഏർപെടുത്തിയ "സംസ്കൃതി-സി.വി ശ്രീരാമൻ സാഹിത്യ പുരസ്കാര"ത്തിന് ദോഹയിലെ ഹർഷ മോഹൻ സജിൻ അർഹയായി.ഹർഷയുടെ 'ബോൺസായ്‌' എന്ന ചെറുകഥയാണ് പുരസ്കാരത്തിനായി തെരഞ്ഞെടുക്കപ്പെട്ടത്. പ്രശസ്ത എഴുത്തുകാരൻ സന്തോഷ് ഏച്ചിക്കാനം ചെയർമാനും സാഹിത്യകാരന്മാരായ പ്രൊഫ. സിപി അബൂബക്കർ , അശോകൻ ചെരുവിൽ എന്നിവർ അംഗങ്ങളുമായ ജൂറിയാണ് വിജയിയെ നിർണ്ണയിച്ചത്.
അമ്പതിനായിരം രൂപയും പ്രശസ്തി ഫലകവും ഉള്‍പ്പെടുന്നതാണ് പുരസ്കാരം.വിവിധ ജിസിസി രാജ്യങ്ങളിലെ എഴുത്തുകാരിൽ നിന്നും ലഭിച്ച അറുപതിലധികം
ചെറുകഥകളില്‍ നിന്നാണ് ഹര്‍ഷയുടെ ചെറുകഥ പുരസ്‌കാരത്തിന് അര്‍ഹമായത്.
ആദ്യമായാണ് ഖത്തറില്‍ നിന്നുള്ള രചന അവാര്‍ഡിന് അര്‍ഹമാകുന്നത് .
നവംബർ 1നു ദോഹയിലെ ഐസിസി അശോക ഹാളിൽ നടക്കുന്ന സംസ്കൃതി കേരളോത്സവം പരിപാടിയിൽ ജൂറി ചെയർമാൻ സന്തോഷ് ഏച്ചിക്കാനം പുസ്കാരം സമ്മാനിക്കും. തുടർന്ന് സിവി ശ്രീരാമന്റെ കഥകളെ ആസ്പദമാക്കി ബിജു പി മംഗലം രചനയും ഗണേഷ് ബാബു മയ്യിൽ സംവിധാനവും നിർവഹിച്ച "മാടയുടെ ലോകം" എന്ന നാടകവും അരങ്ങേറുമെന്ന് സംസ്കൃതി ഭാരവാഹികൾ വാർത്താ സമ്മേളനത്തിൽ അറിയിച്ചു.
