April 12, 2022
April 12, 2022
ദോഹ : യാത്രക്കാരുടെ ചികിത്സാ സംബന്ധമായ സേവനങ്ങൾക്കായി പ്രവർത്തനമാരംഭിച്ച ഹമദ് ട്രാവൽ ക്ലിനിക്കിന്റെ പ്രവർത്തനം കൂടുതൽ വിപുലീകരിക്കുമെന്ന് ഡോക്ടർ മുന അൽ മസ്ലമാനി അറിയിച്ചു. ഹമദ് മെഡിക്കൽ കോർപറേഷന്റെ കീഴിലുള്ള കമ്മ്യൂണിക്കബിൾ ഡിസീസ് സെന്ററിൽ പ്രവർത്തിക്കുന്ന ട്രാവൽ ക്ലിനിക്കിലൂടെ ഇതുവരെ 4366 യാത്രികർക്ക് സേവനം നൽകാൻ കഴിഞ്ഞിട്ടുണ്ട്. 2017 ലാണ് ക്ലിനിക്ക് പ്രവർത്തനം ആരംഭിച്ചത്.
2020 ലെ കണക്കുകളുമായി തുലനം ചെയ്യുമ്പോൾ, 2021 വർഷത്തിൽ 25 % യാത്രക്കാരുടെ വർധനവാണ് ക്ലിനിക്കിൽ ഉണ്ടായത്. ഈ വർഷവും യാത്രക്കാരുടെ ഒഴുക്ക് തുടരുന്നതിനാൽ, ക്ലിനിക്കിന്റെ പ്രവർത്തനസമയം അടക്കമുള്ള കാര്യങ്ങളിൽ മാറ്റം വരുത്താനാണ് അധികൃതരുടെ നീക്കം. നിലവിൽ തിങ്കൾ, ബുധൻ എന്നീ ദിവസങ്ങളിലാണ് ക്ലിനിക്ക് പ്രവർത്തിക്കുന്നത്. ഓരോ ആഴ്ചയിലും ഒരു ദിവസം കൂടി ക്ലിനിക്ക് തുറന്നു പ്രവർത്തിപ്പിക്കാൻ അധികൃതർ ഒരുങ്ങുന്നതായാണ് സൂചനകൾ. വിദേശയാത്രക്ക് മുൻപ് വിവിധ ടെസ്റ്റുകളും വാക്സിനേഷനും നടത്തേണ്ടവർക്കും, യാത്ര കഴിഞ്ഞെത്തുന്നവർക്കും ട്രാവൽ ക്ലിനിക്കിന്റെ സേവനം ഏറെ ഉപകാരപ്രദമാണ്.
