July 07, 2021
July 07, 2021
ദോഹ: അവര്‍ 15 പേര്‍ ഖത്തറിന്റെ പതാകവാഹകരായി ടോക്കിയോ ഒളിമ്പിക്‌സില്‍ തിളങ്ങും. ജൂലൈ 23 മുതല്‍ ഓഗസ്റ്റ് 8 വരെ നടക്കുന്ന ടോക്കിയോ 2020 ഒളിമ്പിക് ഗെയിംസില്‍ പങ്കെടുക്കുന്നത് പ്രമുഖരായ 15 താരങ്ങളാണ്. ഏഴ് കായിക ഇനങ്ങളിലായാണ് ഇവര്‍ ഖത്തറിന്റെ അഭിമാനമാവാന്‍ പോകുന്നത്. കായിക ഭൂപടത്തില്‍ ഈ കൊച്ചു രാജ്യത്തിന്റെ സ്ഥാനം ചെറുതല്ലെന്ന് ഇവര്‍ തെളിയിക്കുമെന്ന ആത്മവിശ്വാസത്തിലാണ് ഖത്തരികള്‍.മത്സരങ്ങള്‍ക്ക് മുന്നോടിയായി ടീം ഖത്തറിനെ പിന്തുണയ്ക്കുന്നതിനായി ഖത്തര്‍ ഒളിമ്പിക് കമ്മിറ്റി പ്രമോഷണല്‍ കാമ്പയിന്‍ ആരംഭിച്ചു കഴിഞ്ഞു. ടീം ഖത്തര്‍ മൊത്തം ഏഴ് കായിക ഇനങ്ങളിലും 6 ട്രാക്ക്ആന്റ് ഫീല്‍ഡ് വിഭാഗങ്ങളിലും മത്സരിക്കും. റോവിംഗ്, അത്ലറ്റിക്‌സ് കായിക ഇനങ്ങളില്‍ രണ്ട് വനിതാ അത്ലറ്റുകള്‍ പങ്കെടുക്കുന്നുവെന്നത് ഏറെ പ്രത്യേകതയുള്ളതാണ്.
മുത്താസ് ബര്‍ഷിം, അബ്ദുറഹ്‌മാന്‍ സാംബ, അബുബക്കര്‍ ഹൈദര്‍, അബ്ദുറഹ്‌മാന്‍ സയീദ് ഹസ്സന്‍, മുസാബ് ആദം, ഫെമി ഒഗുനോദ്, അഷ്റഫ് അംഗദ് എല്‍-സീഫി (അത്ലറ്റിക്‌സ്), മുഹമ്മദ് അല്‍ റുമൈഹി (ഷൂട്ടിംങ്), ഫാരിസ് ഇബ്രാഹിം (ഭാരോദ്വഹനം), ശെരിഫ് യൂനുസ് (ബീച്ച് വോളിബോള്‍) ), അയ്യൂബ് അല്‍ ഇദ്രിസി (ജൂഡോ), അബ്ദുല്‍ അസീസ് അല്‍ ഉബൈദലി (നീന്തല്‍) എന്നിവരാണ് ഖത്തറിന്റെ താരങ്ങള്‍.
100 മീറ്റര്‍ ഇനത്തില്‍ ബഷെയര്‍ അല്‍മാന്‍വാരിയും തുഴച്ചിലില്‍ ചരിത്രത്തിലാദ്യമായി ഖത്തറി വനിതാ അത്ലറ്റ് താല അബു ജുബാരയും പങ്കെടുക്കും. സമൂഹമാധ്യമങ്ങളിലെല്ലാം ഇവര്‍ക്ക് പിന്തുണ അര്‍പ്പിച്ചുകൊണ്ടുള്ള പോസ്റ്റുകള്‍ പ്രചരിക്കാന്‍ തുടങ്ങിയിട്ടുണ്ട്. ഫേസ്ബുക്ക്, യൂട്യൂബ്, ഇന്‍സ്റ്റഗ്രാം,ട്വിറ്റര്‍ തുടങ്ങിയവയിലൂടെയെല്ലാം താരങ്ങള്‍ക്ക് പിന്തുണ നല്‍കാന്‍ ഖത്തര്‍ ഒളിമ്പിക് കമ്മിറ്റി ആഹ്വാനം ചെയ്തിട്ടുണ്ട്.
