February 21, 2022
February 21, 2022
ദോഹ : ഖത്തറിലെ തദ്ദേശീയ ഫാമുകളിലും കൃഷിയിടങ്ങളിലും വിളവെടുത്ത പഴ-പച്ചക്കറികളും, നാടൻ തേനും വാങ്ങാൻ അവസരമൊരുക്കി മുനിസിപ്പാലിറ്റി മന്ത്രാലയം. മന്ത്രാലയവും സൂഖ് വാഖിഫും സംയുക്തമായി സംഘടിപ്പിക്കുന്ന പ്രദർശനമേള, അൽ അഹമ്മദ് സ്‌ക്വയറിൽ ആരംഭിച്ചു. മേള മാർച്ച് 1 വരെ നീണ്ടുനിൽക്കും.
ഇടനിലക്കാരുടെ ഇടപെടലില്ലാതെ, കൃത്യമായ വിലയ്ക്ക് സാധനങ്ങൾ വിൽക്കാനും വാങ്ങാനും കഴിയുമെന്നതിനാൽ ഉല്പാദകർക്കും ഉപഭോക്താക്കൾക്കും ഈ മേള ഉപകാരപ്രദമാണെന്ന് സൂഖ് വാഖിഫ് ഡയറക്ടർ മുഹമ്മദ് അബ്ദുള്ള അൽ സലീം അഭിപ്രായപെട്ടു. വിവിധ രാജ്യങ്ങളിൽ നിന്നുള്ള വിദേശികൾക്ക് ഖത്തർ കാർഷികമേഖലയിലെ വൈവിധ്യങ്ങളെ അടുത്തറിയാനും മേള സഹായിക്കുമെന്നും അദ്ദേഹം കൂട്ടിച്ചേർത്തു. വിവിധ ഫാമുകളും ചെറുകിട കർഷകരും പ്രതിനിധാനം ചെയ്യുന്ന, 70 പവലിയനുകളാണ് മേളയിലുള്ളത്. മേള സന്ദർശിക്കാൻ എത്തുന്നവർ കോവിഡ് മാനദണ്ഡങ്ങൾ കൃത്യമായി പാലിക്കണമെന്ന് അധികൃതർ മുന്നറിയിപ്പ് നൽകി.
