September 20, 2019
September 20, 2019
അതേസമയം, റിപ്പോര്‍ട്ടിനെ കുറിച്ച് പ്രതികരിക്കാന്‍ അദാനി ഗ്രൂപ്പോ ഖത്തര്‍ ഇന്‍വെസ്റ്റ്‌മെന്റ് അതോറിറ്റിയോ തയാറായിട്ടില്ല.
ദോഹ: ഇന്ത്യയില്‍ അദാനി ഗ്രൂപ്പിന്റെ ഊര്‍ജ വിതരണ പദ്ധതിയില്‍ ഖത്തര്‍ ഫണ്ട് പങ്കാളികളാകുന്നതായി ഇക്കണോമിക് ടൈംസ് പത്രം റിപ്പോര്‍ട്ട് ചെയ്തു. അദാനിയുടെ ഊര്‍ജ പ്രസരണ-വിതരണ കമ്പനിയായ അദാനി ഇലക്ട്രിസിറ്റി മുംബൈ ലിമിറ്റഡി(എ.ഇ.എം.എല്‍)ലാണ് ഖത്തര്‍ നിക്ഷേപ അതോറിറ്റി നിക്ഷേപമിറക്കുന്നത്.
ഇന്ത്യയിലെ ഏറ്റവും വലിയ സ്വകാര്യ മേഖലാ ഊര്‍ജ വിതരണ സ്ഥാപനമാണ് എ.ഇ.എം.എല്‍. അദാനി ട്രാന്‍സ്മിഷന്‍ ലിമിറ്റഡി(എ.ടി.എല്‍)ന്റെ അനുബന്ധ സ്ഥാപനമാണിത്. 2018 ഓഗസ്റ്റില്‍ അനില്‍ അംബാനിയാണ് തങ്ങളുടെ മുംബൈയിലെ ഊര്‍ജ വിതരണ ബിസിനസ് സംരംഭം എ.ടി.എല്ലിന് 12,700 കോടി രൂപയ്ക്കു വില്‍ക്കുന്നത്. എസ്.ബി.ഐ, യെസ് ബാങ്ക്, ഐ.സി.ഐ.സി.ഐ ബാങ്ക് എന്നിവ അടങ്ങുന്ന കണ്‍സോര്‍ഷ്യം ബാങ്കുകളില്‍ നിന്ന് 8,500 കോടി കടമെടുത്താണ് സംരംഭം എ.ടി.എല്‍ ഏറ്റെടുത്തത്.
പുറത്തുവരുന്ന റിപ്പോര്‍ട്ടുകള്‍ പ്രകാരം 3,000-4,000 കോടി രൂപയുടെ നിക്ഷേപമിറക്കി എ.ഇ.എം.എല്ലിന്റെ 25 ശതമാനം ഓഹരി ഖത്തര്‍ ഫണ്ട് സ്വന്തമാക്കും. സാമ്പത്തികമായി തകര്‍ച്ചയിലുള്ള കമ്പനിയുടെ ആസ്തികള്‍ വിറ്റഴിച്ച് ബാധ്യത തീര്‍ക്കുന്ന നടപടിയുടെ ഭാഗമായാണ് ഖത്തര്‍ ഫണ്ട് ഓഹരി വാങ്ങുന്നതെന്നാണ് വിവരം. എ.ഇ.എം.എല്ലിന്റെ പരിപാലനത്തിനും നിലവിലെ വിതരണ ശൃംഖല ഉയര്‍ത്താനും മൂലധനം വര്‍ധിപ്പിക്കാനുമായി 1,200 കോടി രൂപയും ഖത്തര്‍ ഫണ്ട് വകയിരുത്തും. അതേസമയം, റിപ്പോര്‍ട്ടിനെ കുറിച്ച് പ്രതികരിക്കാന്‍ അദാനി ഗ്രൂപ്പോ ഖത്തര്‍ ഇന്‍വെസ്റ്റ്‌മെന്റ് അതോറിറ്റിയോ തയാറായിട്ടില്ല.
