February 24, 2022
February 24, 2022
ദോഹ : ഖത്തർ താമസവിസയുള്ളവർ വിദേശരാജ്യങ്ങളിൽ നിന്നും രാജ്യത്തെത്തിയാൽ കൊറന്റൈൻ വേണ്ടതില്ലെന്ന് പൊതുജനാരോഗ്യ മന്ത്രാലയം വ്യക്തമാക്കി. ഇവർ യാത്ര പുറപ്പെടുന്നതിന് മുൻപ് പീ.സീ.ആർ ടെസ്റ്റും ചെയ്യേണ്ടതില്ല. റെഡ് ലിസ്റ്റിൽ ഉൾപ്പെട്ട രാജ്യങ്ങളിൽ നിന്ന് വരുന്നവർക്കടക്കം മുഴുവൻ ആളുകൾക്കും ഈ ഇളവ് ലഭിക്കും. ഫെബ്രുവരി 28 തിങ്കളാഴ്ച വൈകുന്നേരം 7 മണി മുതലാണ് ഈ മാറ്റങ്ങൾ പ്രാബല്യത്തിൽ വരിക.
വിദേശത്ത് നിന്നും എത്തുന്ന താമസവിസക്കാർ ഖത്തറിലെത്തി 24 മണിക്കൂറിനകം ആന്റിജൻ പരിശോധന നടത്തണം. വാക്സിനേഷൻ പ്രക്രിയ പൂർത്തിയാക്കിയവർക്കും, കോവിഡിൽ നിന്നും അടുത്തിടെ മുക്തി നേടിയവർക്കുമാണ് മേല്പറഞ്ഞ ഇളവുകൾ ലഭിക്കുക. വാക്സിൻ എടുക്കാത്ത ആളുകൾ അഞ്ചുദിവസം ഹോം കൊറന്റൈനിൽ കഴിയണം. അഞ്ചാം ദിവസം നടത്തുന്ന ആന്റിജൻ പരിശോധനയുടെ ഫലമനുസരിച്ച് ഇവർക്ക് പുറത്തിറങ്ങാം. വാക്സിൻ എടുക്കാത്തവർ, യാത്ര പുറപ്പെടുന്നതിന്റെ 48 മണിക്കൂർ മുൻപെങ്കിലും നടത്തിയ കോവിഡ് പരിശോധന ഫലം ഹാജരാക്കുകയും വേണം. സന്ദർശകവിസയിൽ ഖത്തറിൽ എത്തുന്നവർ വാക്സിനേഷൻ പൂർത്തിയാക്കിയവരാണെങ്കിൽ കൊറന്റൈനിൽ കഴിയേണ്ടതില്ല, എന്നാൽ ഇവർ പീസീആർ പരിശോധനാ ഫലം ഹാജരാക്കണം.