March 29, 2022
March 29, 2022
ദോഹ : ഖത്തർ ഫുട്‍ബോൾ ലോകകപ്പിന്റെ സ്പോൺസർമാരിലൊരാളായി മാറിയതിന് പിന്നാലെ, ബൈജൂസ് ആപ്പിന്റെ പ്രവർത്തനം ഖത്തറിലേക്കും വ്യാപിപ്പിക്കുന്നു. ഖത്തറിലെ നിക്ഷേപക അതോറിറ്റിയായ ക്യു.ഐ.എ.യുമായി സഹകരിച്ച് എഡു-ടെക് വിദ്യാഭ്യാസകേന്ദ്രം ആരംഭിക്കാൻ തീരുമാനിച്ചതായി ബൈജൂസ് അറിയിച്ചു. ബംഗളൂരു ആസ്ഥാനമായി പ്രവർത്തിക്കുന്ന ബൈജൂസ്, മലയാളിയായ ബൈജു രവീന്ദ്രന്റെ ഉടമസ്ഥതയിലുള്ള കമ്പനിയാണ്.
വിദ്യാഭ്യാസസമുച്ചയത്തിന്റെ പ്രാരംഭചർച്ചകൾക്ക് ശേഷം, ബൈജു രവീന്ദ്രൻ, ക്യു.ഐ.എ. സിഇഓ ആയ മൻസൂർ അൽ മഹ്‌മൂദ്‌ എന്നിവർ ചേർന്ന് ധാരണാപത്രത്തിൽ ഒപ്പുവെക്കുകയും ചെയ്തു. വിദേശകാര്യമന്ത്രി ഷെയ്ഖ് മുഹമ്മദ്‌ ബിൻ അബ്ദുൾ റഹ്മാൻ അൽ താനിയും ചടങ്ങിൽ പങ്കെടുത്തു. മിഡിൽ ഈസ്റ്റ് നോർത്ത് ആഫ്രിക്ക (മെന) മേഖലയിൽ ഊന്നൽ കൊടുത്തുകൊണ്ടുള്ള ഓൺലൈൻ വിദ്യാഭ്യാസം നൽകാനാണ് ബൈജൂസ് പുതിയ പദ്ധതിയിലൂടെ ലക്ഷ്യമിടുന്നത്. ഒപ്പം ഗവേഷണത്തിനുള്ള സൗകര്യവും സെന്ററിൽ ഒരുക്കും.
