December 10, 2021
December 10, 2021
ദോഹ : പ്രഥമ അറബ് കപ്പിന്റെ നോക്ക് ഔട്ട് റൗണ്ട് ഘട്ടങ്ങൾക്ക് ഇന്ന് തുടക്കമാവും. നാല് ഗ്രൂപ്പുകളിൽ നിന്നും ആദ്യരണ്ട് സ്ഥാനങ്ങൾ സ്വന്തമാക്കി മുന്നേറിയ എട്ട് ടീമുകളാണ് നോക്ക് ഔട്ട് ഘട്ടത്തിൽ ഏറ്റുമുട്ടുന്നത്. ആതിഥേയരായ ഖത്തറും, അയൽക്കാരായ യുഎഇയും തമ്മിലുള്ള മത്സരമാണ് ക്വാർട്ടർ ഫൈനൽ റൗണ്ടിലെ ഗ്ലാമർ പോരാട്ടം.
ഗ്രൂപ്പ് ഘട്ടത്തിലെ മൂന്ന് മത്സരങ്ങളും ആധികാരികമായി വിജയിച്ചെത്തുന്ന ഖത്തർ ആത്മവിശ്വാസത്തിന്റെ നെറുകയിലാണ്‌. ഇറാഖ്, ഒമാൻ, ബഹ്‌റൈൻ എന്നീ ടീമുകളെ നേരിട്ട ഖത്തർ ആറുഗോളുകൾ നേടിയപ്പോൾ, ഒരൊറ്റ തവണ മാത്രമാണ് എതിരാളികൾക്ക് വല ചലിപ്പിക്കാൻ കഴിഞ്ഞത്. ടൂണിഷ്യ ഉൾപ്പെട്ട ഗ്രൂപ്പിൽ നിന്നും രണ്ടാം സ്ഥാനക്കാരായാണ് യുഎഇ ക്വാർട്ടർഫൈനലിലേക്ക് മുന്നേറിയത്. ഇന്ത്യൻ സമയം രാത്രി 12.30 ന് അൽ ബെയ്ത്ത് സ്റ്റേഡിയത്തിലാണ് ഈ സൂപ്പർ പോരാട്ടം. ഇന്ന് രാത്രി 8:30 ന് നടക്കുന്ന ആദ്യ ക്വാർട്ടർ ഫൈനലിൽ ട്യുണീഷ്യയും ഒമാനും ഏറ്റുമുട്ടും. എഡ്യൂക്കേഷൻ സിറ്റി സ്റ്റേഡിയമാണ് മത്സരത്തിന് വേദിയാവുന്നത്. നാളെ നടക്കുന്ന മറ്റ് ക്വാർട്ടർഫൈനൽ മത്സരങ്ങളിൽ ഈജിപ്ത് ജോർദാനെയും, മൊറോക്കോ അൾജീരിയയേയും നേരിടും.
