July 17, 2022
July 17, 2022
ദോഹ: സുരക്ഷയ്ക്കും വികസനത്തിനും വേണ്ടിയുള്ള ജിദ്ദ ഉച്ചകോടിക്കിടെ ഖത്തർ അമീർ ശൈഖ് തമീം ബിൻ ഹമദ് അൽതാനി അമേരിക്കൻ പ്രസിഡന്റ് ജോ ബൈഡനുമായി കൂടിക്കാഴ്ച നടത്തി.2022ലെ ഫിഫ ലോകകപ്പിന് ഖത്തർ വേദിയാകാനിരിക്കെ, സുരക്ഷ, പ്രതിരോധം, കായിക മേഖലകളിൽ ഇരു രാജ്യങ്ങളും തമ്മിലുള്ള തന്ത്രപരമായ ബന്ധങ്ങളും സഹകരണവും മെച്ചപ്പെടുത്താനുള്ള മാർഗങ്ങൾ കൂടിക്കാഴ്ചയിൽ ഇരു നേതാക്കളും ചർച്ച ചെയ്തു.
പ്രാദേശികവും അന്തർദേശീയവുമായ സംഭവവികാസങ്ങളും കൂടിക്കാഴ്ചയിൽ ചർച്ചയായി.മേഖലയിൽ സുരക്ഷയും സ്ഥിരതയും പ്രോത്സാഹിപ്പിക്കുന്നതിൽ ഖത്തറിന്റെ പങ്കിനും അഫ്ഗാനിസ്ഥാനിലെ സമാധാന പ്രക്രിയയിലെ ശ്രമങ്ങൾക്കും യുഎസ് പ്രസിഡന്റ് ഖത്തർ അമീറിന് നന്ദിയും അഭിനന്ദനവും അറിയിച്ചു.
ഇതിനിടെ,നവംബറിൽ ഖത്തറിൽ നടക്കാനിരിക്കുന്ന ഫിഫാ ലോകകപ്പിന് ജിസിസി രാജ്യങ്ങൾ പിന്തുണ പ്രഖ്യാപിച്ചു.അഫ്ഗാൻ ജനതയുടെ സുരക്ഷയ്ക്കും സ്ഥിരതയ്ക്കും വേണ്ടി ഖത്തർ നടത്തുന്ന സമാധാന ശ്രമങ്ങളെ ഉച്ചകോടിയിൽ പാസാക്കിയ പ്രമേയത്തിൽ ജിസിസി നേതാക്കൾ പ്രത്യേകം അഭിനന്ദിച്ചു.
ശനിയാഴ്ച ചേർന്ന സുരക്ഷാ ഉച്ചകോടിയിൽ ആറ് ജിസിസി രാജ്യങ്ങൾക്ക് പുറമെ,ഈജിപ്ത്,ജോർദാൻ,ഇറാഖ് എന്നീ രാജ്യങ്ങളിൽ നിന്നുള്ള പ്രതിനിധികൾക്ക് പുറമെ അമേരിക്കൻ പ്രസിഡന്റ് ജോ ബൈഡനും പങ്കെടുത്തു.പശ്ചിമേഷ്യൻ സന്ദർശനത്തിന്റെ ഭാഗമായി സൗദിയിൽ എത്തിയതായിരുന്നു ജോ ബൈഡൻ.
ന്യൂസ്‌റൂം വാർത്തകൾ ലഭിക്കാൻ ഈ ലിങ്കിൽ(https://www.facebook.com/groups/Newsroomclub) ക്ലിക്ക് ചെയ്ത് ന്യൂസ്‌റൂം എഫ്.ബി പേജിൽ അംഗമാവുക.വാട്സ്ആപ്പിൽ വാർത്തകൾ ലഭിക്കാൻ 00974 33450597 വാട്സ്ആപ് നമ്പറിൽ സന്ദേശമയക്കുക
