January 21, 2022
January 21, 2022
ദോഹ : ഖത്തറിലെ ഏറ്റവും പ്രചാരമേറിയ ഫുട്ബോൾ ടൂർണമെന്റുകളിൽ ഒന്നായ അമീർ കപ്പിന്റെ അൻപതാം പതിപ്പിന്റെ മത്സരക്രമം പുറത്തുവിട്ടു. ഫെബ്രുവരി 13 മുതലാണ് 'റൗണ്ട് ഓഫ് 16' മത്സരങ്ങൾ ആരംഭിക്കുക. ഖത്തർ ഫുട്ബോൾ അസോസിയേഷനാണ് 16 ടീമുകളെ രണ്ട് പൂളുകൾ ആക്കി നറുക്കെടുത്ത് മത്സരക്രമം നിർണ്ണയിച്ചത്.
നിലവിലെ ചാമ്പ്യന്മാരായ അൽ സദ്ദ് എഫ്സിയും, രണ്ടാം ഡിവിഷനിൽ നിന്നുള്ള മുഐതറും തമ്മിലാണ് ആദ്യ മത്സരം. ഗ്രാൻഡ് ഹമദ് സ്റ്റേഡിയമാണ് മത്സരത്തിന് വേദിയാവുന്നത്. അന്ന് നടക്കുന്ന രണ്ടാം മത്സരത്തിൽ ഖത്തർ എസ്.സിയും അൽ ശമാലും ഏറ്റുമുട്ടും. നാല് ദിവസങ്ങളിലായാണ് 'റൗണ്ട് ഓഫ് 16' മത്സരങ്ങൾ അരങ്ങേറുക. നിശ്ചിത സമയത്ത് ടീമുകൾ തുല്യത പാലിച്ചാൽ എക്ട്രാ ടൈം ഉണ്ടാവില്ലെന്നും, ഷൂട്ട് ഔട്ടിലൂടെ വിജയിയെ കണ്ടെത്തുമെന്നും ടൂർണമെന്റ് സംഘാടകർ അറിയിച്ചു.