February 15, 2021
February 15, 2021
ദോഹ: ഖത്തറില്‍ 60 വയസിനു മുകളില്‍ പ്രായമുള്ള എല്ലാ പൗരന്മാരും താമസക്കാരും എത്രയും പെട്ടെന്ന് കൊവിഡ്-19 പ്രതിരോധ വാക്‌സിന്‍ സ്വീകരിക്കണമെന്ന് പൊതുജനാരോഗ്യ മന്ത്രാലയം. ഖത്തര്‍ വാര്‍ത്താ ഏജന്‍സിക്ക് (ക്യു.എന്‍.എ) നല്‍കിയ പ്രസ്താവനയില്‍ നാഷണല്‍ ഹെല്‍ത്ത് സ്ട്രാറ്റജിയുടെ ഹെല്‍ത്തി ഏജിങ് വിഭാഗം മേധാവി ഡോ. ഹനാദി അല്‍ ഹമദ് ആണ് ഇക്കാര്യം അറിയിച്ചത്.
'കൊവിഡ്-19 രോഗികളുടെ എണ്ണത്തില്‍ കഴിഞ്ഞ കുറച്ച് ദിവസങ്ങളായി ഖത്തറില്‍ വലിയ വര്‍ധനവാണ് ഉണ്ടാവുന്നത്. ഇത് കാരണം 60 വയസിനു മുകളിലുള്ള നാല് പേരാണ് മരിച്ചത്. കൊവിഡ് ആരംഭിച്ചതു മുതല്‍ പ്രായമേറിയവര്‍ എന്നത് അപകടസാധ്യത ഏറിയ വിഭാഗത്തിലാണ് ഉള്‍പ്പെടുന്നത്.' -അവര്‍ പറഞ്ഞു.
'60 വയസിനു മുകളില്‍ പ്രായമുള്ളവര്‍ക്ക് കൊറോണ വൈറസ് കാരണം ഗുരുതരമായ സങ്കീര്‍ണ്ണതകളും മരണവും ഉണ്ടാകാനുള്ള സാധ്യത വളരെ കൂടുതലാണ്. ഇപ്പോള്‍ നമുക്ക് അംഗീകൃതവും ഫലപ്രദവുമായ വാക്‌സിന്‍ ഉണ്ട്. അതിനാല്‍ തന്നെ പ്രായമായവര്‍ക്ക് വൈറസിന്റെ ഭീഷണിയില്‍ നിന്ന് രക്ഷപ്പെടാനും ജീവിക്കാനും അവസരമുണ്ട്.' -അവര്‍ കൂട്ടിച്ചേര്‍ത്തു.
'കൊവിഡ്-19 ബാധിച്ചതിനെ തുടര്‍ന്നുള്ള കടുത്ത സങ്കീര്‍ണ്ണതകള്‍ കാരണം ഐ.സി.യുവില്‍ പ്രവേശിപ്പിക്കപ്പെടുന്നവരുടെ എണ്ണത്തില്‍ ഗണ്യമായ അടുത്തിടെയായി ഉണ്ടായത്. പ്രായമായവരില്‍ പലര്‍ക്കും ദീര്‍ഘകാലമായുള്ള രോഗാവസ്ഥകള്‍ ഉള്ളതിനാലാണ് അവര്‍ കൊവിഡ് കാരണമുള്ള സങ്കീര്‍ണ്ണതകള്‍ക്ക് ഇരയാവുന്നത്.' -ഡോ. ഹനാദി അല്‍ ഹമദ് പറഞ്ഞു.
വാക്‌സിനേഷന്റെ പ്രാധാന്യത്തെ കുറിച്ച് പ്രായമായ ബന്ധുക്കളെ പറഞ്ഞ് മനസിലാക്കാന്‍ കുട്ടികളോട് ഡോ. ഹനാദി ആവശ്യപ്പെട്ടു. പ്രായമായവരില്‍ ചിലര്‍ ഇപ്പോഴും വാക്‌സിന്‍ സ്വീകരിക്കാന്‍ വിമുഖത കാണിക്കുന്നു. ഖത്തറില്‍ ഇതിന് ധാരാളം തെളിവുകളുണ്ടെന്നും അവര്‍ പറഞ്ഞു. പ്രായമായ ബന്ധുക്കള്‍ ഉള്ള എല്ലാവരും വാക്‌സിനെ കുറിച്ചുള്ള അവരുടെ ഭയം മറികടക്കാന്‍ സഹായിക്കുകയും അവരുടെ പ്രാദേശിക ആരോഗ്യ കേന്ദ്രത്തില്‍ വാക്‌സിന്‍ എടുക്കാനായി വളരെ പെട്ടെന്ന് അപ്പോയിന്റ്‌മെന്റ് ലഭ്യമാക്കാന്‍ സഹായിക്കുകയും വേണമെന്ന് ഡോ. ഹനാദി അഭ്യര്‍ത്ഥിച്ചു.
ന്യൂസ് റൂം വാർത്തകൾ ഫേസ്ബുക്കിൽ ലഭിക്കാനായി ഇവിടെ ക്ലിക്ക് ചെയ്ത് പേജ് ലൈക്ക് ചെയ്യൂ.
ന്യൂസ് റൂം വാര്‍ത്തകള്‍ ടെലിഗ്രാമില്‍ മുടങ്ങാതെ ലഭിക്കാനായി ഇവിടെ ക്ലിക്ക് ചെയ്യൂ.
ന്യൂസ് റൂം വാര്‍ത്തകള്‍ വാട്ട്‌സ്ആപ്പില്‍ മുടങ്ങാതെ ലഭിക്കാനായി ഇവിടെ ക്ലിക്ക് ചെയ്ത് മെസേജ് അയക്കൂ.
