May 06, 2024
May 06, 2024
തെൽ അവീവ്: ഖത്തർ ആസ്ഥാനമായി പ്രവർത്തിക്കുന്ന അൽ ജസീറയുടെ ഇംഗ്ലീഷ്, അറബി ചാനലുകൾക്ക് ഇസ്രായേലിൽ പ്രവർത്തനാനുമതി വിലക്കിയ ഇസ്രായേൽ മന്ത്രിസഭ തീരുമാനത്തിനെതിരെ വ്യാപക വിമർശനം. ഐക്യരാഷ്ട്ര സഭ ഉൾപ്പെടെ വിമർശനവുമായി രംഗത്തെത്തിയിട്ടുണ്ട്. വിവിധ രാജ്യങ്ങളും ഇതിനെ അപലപിച്ചു.
ലോക മാധ്യമ സ്വാതന്ത്ര്യ ദിനം ആചരിച്ച് മൂന്ന് ദിവസം തികയും മുമ്പാണ് നടപടി. ഏകകണ്ഠമായാണ് മന്ത്രിസഭ തീരുമാനമെടുത്തതെന്ന് ഇസ്രായേൽ വാർത്താ വിതരണ മന്ത്രി ശലോമോ കർഹി അറിയിച്ചു. നിരോധനം ഉടൻ പ്രാബല്യത്തിൽ വരുമെന്നാണ് റിപ്പോർട്ട്.
ഉള്ളടക്കം സംപ്രേഷണം ചെയ്യാൻ അനുവദിക്കാത്തതിന് പുറമേ, ഓഫിസ് പൂട്ടി റിപ്പോർട്ടർമാരെ പുറത്താക്കാനുമാണ് തീരുമാനം. ഫോണും കമ്പ്യൂട്ടറുകളും ഉൾപ്പെടെ ഉപകരണങ്ങൾ പിടിച്ചെടുക്കും. വെബ്സൈറ്റിനും രാജ്യത്ത് നിയന്ത്രണം ഏർപ്പെടുത്തും. 45 ദിവസത്തേക്കാണ് വിലക്ക് ഏർപ്പെടുത്തിയതെങ്കിലും പിന്നീട് ഇത് സ്ഥിരമാക്കാനാണ് ധാരണയെന്നാണ് റിപ്പോർട്ട്.
ഉപരോധിക്കപ്പെട്ട എന്ക്ലേവില് നിന്നും യുദ്ധസമയത്ത് ഗസയില് നിന്നും വാർത്തകൾ തത്സമയം സംപ്രേഷണം ചെയ്ത ചുരുക്കം ചില അന്താരാഷ്ട്ര മാധ്യമ ചാനലുകളിലൊന്നാണ് അല് ജസീറ. ഗസയിലെ ഇസ്രയേലിന്റെ നടപടികളെ പറ്റിയുള്ള വാർത്തകൾ നൽകുന്നുവെന്ന് ആരോപിച്ചാണ് അൽ ജസീറ അടക്കമുള്ള മാധ്യമങ്ങൾക്ക് വിലക്കേർപ്പെടുത്താൻ നെതന്യാഹു തീരുമാനിച്ചത്.
ഒക്ടോബറില് ഗസയില് ഇസ്രായേല് യുദ്ധം ആരംഭിച്ചത് മുതല്, കോടതികളുടെ സമ്മതത്തോടെ ദേശീയ താൽപര്യങ്ങള്ക്ക് ഭീഷണിയാണെന്ന് കരുതുന്ന വിദേശ മാധ്യമങ്ങളെ താത്ക്കാലികമായി അടച്ചിടാന് ഇസ്രായേല് സര്ക്കാര് യുദ്ധകാല നിയന്ത്രണങ്ങള് പാസാക്കിയിരുന്നു.
ഗസയിലെ യുദ്ധത്തിനിടെ, ചാനലിന്റെ നിരവധി പത്രപ്രവര്ത്തകരും അവരുടെ കുടുംബാംഗങ്ങളും ഇസ്രായേല് ബോംബാക്രമണത്തില് കൊല്ലപ്പെട്ടിരുന്നു. ഒക്ടോബര് 25-ന് ഗസ ബ്യൂറോ ചീഫ് വെയ്ല് ദഹ്ദൂഹിന്റെ ഭാര്യയും മകനും മകളും ചെറുമകനും മറ്റ് എട്ട് ബന്ധുക്കളും ഉള്പ്പെടെയുള്ള കുടുംബം വ്യോമാക്രമണത്തില് കൊല്ലപ്പെട്ടു.
അതേസമയം, വെസ്റ്റ് ബാങ്കിലും ഗസയിലുമുള്ള അൽജസീറയുടെ ഓഫീസുകൾക്ക് നേരെ നിരവധി തവണ ഇസ്രായേൽ ആക്രമണം നടത്തിയിരുന്നു. 2022 ൽ വെസ്റ്റ് ബാങ്ക് പട്ടണമായ ജെനിനിൽ ഇസ്രായേൽ സൈനിക റെയ്ഡ് റിപ്പോർട്ട് ചെയ്യുന്നതിനിടെ അൽ ജസീറയുടെ മുതിർന്ന മാധ്യമപ്രവർത്തകനായ ഷിറിൻ അബു അക്ലയെ ഇസ്രായേൽ സൈന്യം വെടിവച്ചു കൊന്നിരുന്നു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F