March 03, 2022
March 03, 2022
മസ്കത്ത് : ഓൺലൈൻ ടാക്സി രംഗത്തെ അതികായരായ ഊബറിന്റെ സേവനം ഇനി ഒമാനിലും. മൊബൈൽ ആപ്ലിക്കേഷൻ ഉപയോഗിച്ചുള്ള ടാക്സി സർവീസ് സേവനത്തിന് ലൈസൻസ് നൽകിയതായി ഒമാൻ ഗതാഗത വാർത്താവിനിമയ മന്ത്രാലയം അറിയിച്ചു. ജനുവരി മാസം മുതൽ തന്നെ മസ്കത്തിൽ പരീക്ഷണാടിസ്ഥാനത്തിൽ ഊബർ സേവനമാരംഭിച്ചിരുന്നു.
വിവിധ രാജ്യങ്ങളിലെ 900 നഗരങ്ങളിൽ ഊബർ ടാക്സി സേവനം നൽകുന്നുണ്ട്. ഇതേ മാതൃകയിൽ തന്നെയാവും ഒമാനിലും കമ്പനി പ്രവർത്തിക്കുകയെന്ന് ഊബർ സ്മാർട്ട് സിറ്റീസ് ചീഫ് എക്സിക്യൂട്ടീവ് ഓഫീസർ അഹ്മദ് സാലിം അൽ സിയബി അറിയിച്ചു. മസ്കത്തിലാണ് ഊബറിന്റെ ഭൂരിഭാഗം തൊഴിലാളികളും ജോലി ചെയ്യുന്നത്. ആകെയുള്ള 730 പേരിൽ 570 പേരും മസ്കത്ത് ഗവർണറേറ്റിൽ സേവനം നൽകും. ഓൺലൈൻ ആയി മുൻകൂട്ടി ബുക്ക് ചെയ്യാതെയും ഊബർ സേവനം ഉപയോഗിക്കാമെന്ന് കമ്പനി വക്താക്കൾ അറിയിച്ചു. മസ്കത്ത് കൂടാതെ, സലാല, സൂർ, സുഹാർ, നിസ്‌വ എന്നിവിടങ്ങളിലും ഊബർ ലഭ്യമാണ്. ഏറെ വൈകാതെ വനിതാ ടാക്‌സികൾ അവതരിപ്പിക്കാനും ഊബറിന് പദ്ധതിയുണ്ട്.
