February 22, 2022
February 22, 2022
മസ്കത്ത് : ഒമാനിലേക്ക് യാത്ര ചെയ്യുന്നതിന് മുൻപ് ആരോഗ്യമന്ത്രാലയത്തിന്റെ വെബ്സൈറ്റിൽ പേര് രജിസ്റ്റർ ചെയ്യണമെന്ന നിബന്ധന ഒഴിവാക്കിയതായി ഒമാൻ സിവിൽ ഏവിയേഷൻ അതോറിറ്റി അറിയിച്ചു. ഇന്നലെ പുറത്തിറക്കിയ പുതിയ സർക്കുലറിലാണ് ഇക്കാര്യം വിശദമാക്കിയത്. രാജ്യത്തെ പ്രതിദിന കോവിഡ് കണക്കിൽ കുറവ് രേഖപ്പെടുത്തിയതിനെ തുടർന്നാണ് നടപടി.
ഒമാൻ അംഗീകരിച്ച വാക്സിനുകളിൽ ഒന്നിന്റെ രണ്ട് ഡോസും സ്വീകരിച്ച വ്യക്തികൾക്ക് രാജ്യത്തെത്താം. ഇവർ വാക്സിനേഷൻ പ്രക്രിയ പൂർത്തിയാക്കിയതിന്റെ സർട്ടിഫിക്കറ്റ് കൈവശം കരുതണം. ഒമാൻ പൗരന്മാർക്കും, 18 വയസിൽ താഴെ പ്രായമുള്ള വിദേശികൾക്കും ഈ നിബന്ധന ബാധകമല്ലെന്നും സർക്കുലറിൽ പറയുന്നു. 18 വയസ്സിന് മുകളിൽ പ്രായമുള്ള മുഴുവൻ വ്യക്തികൾക്കും ആരോഗ്യ ഇൻഷുറൻസ് പരിരക്ഷ നിർബന്ധമാണെന്നും ഏവിയേഷൻ അതോറിറ്റി, സർക്കുലറിലൂടെ അറിയിച്ചു. 24 മണിക്കൂറിനിടയിൽ എടുത്ത പീസീആർ പരിശോധനാ ഫലവും ഹാജരാക്കണം.