April 25, 2021
April 25, 2021
അൻവർ പാലേരി
ദുബായ് / ദോഹ : ഇന്ത്യയിൽ കോവിഡ് സാഹചര്യങ്ങൾ അനുദിനം വഷളായിക്കൊണ്ടിരിക്കുന്ന സാഹചര്യത്തിൽ ഇന്ത്യയിൽ നിന്നും വിവിധ ഗൾഫ്രാജ്യങ്ങളിലേക്കുള്ള യാത്രക്കാർക്ക് ഇന്നലെ അർധരാത്രി മുതൽ യാത്രാവിലക്ക് പ്രാബല്യത്തിൽ വന്നു.അടുത്ത ദിവസങ്ങളിൽ തിരിച്ചുവരാനിരുന്ന മലയാളി കുടുംബങ്ങൾ ഉൾപ്പെടെയുള്ളവരാണ് ഇതോടെ പ്രതിസന്ധിയിലായത്.സൗദിയിൽ നേരത്തെ പ്രഖ്യാപിച്ച യാത്രാവിലക്ക് തുടരുന്നതിനിടെയാണ് യാത്രാവിലക്കിനിടയിലും അനുവദിച്ചിരുന്ന ചില ഇളവുകൾ കൂടി കുവൈത്ത് റദ്ദാക്കിയത്.ഇതിനു പുറമെയാണ് യു.എ.ഇയും ഒമാനും കൂടി ഇന്നലെ മുതൽ താൽക്കാലിക വിലക്ക് ഏർപ്പെടുത്തിയത്.ഇത് രണ്ടാം തവണയാണ് പ്രവാസികൾ ഇത്രയും വലിയൊരു പ്രതിസന്ധി നേരിടുന്നത്.
ഖത്തറും ബഹ്‌റൈനും ഇതുവരെ യാത്രാവിലക്ക് പ്രഖ്യാപിച്ചിട്ടില്ലെങ്കിലും കടുത്ത നിയന്ത്രണം വന്നേക്കുമോ എന്ന ആശങ്കയിൽ തന്നെയാണ് അവരും കഴിയുന്നത്.അതേസമയം,പെരുന്നാളിന് നാടാണയാൻ കണക്കാക്കി നാട്ടിലേക്ക് ടിക്കറ്റെടുത്ത നിരവധി പേർ യാത്ര റദ്ദാക്കിയതായി ദോഹയിലെ പ്രമുഖ ട്രാവൽ ഏജൻസികൾ 'ന്യൂസ്‌റൂ'മിനോട് പറഞ്ഞു.നാട്ടിലെത്തിയ ശേഷം യാത്രാവിലക്ക് ഉൾപെടെയുള്ള നിയന്ത്രണങ്ങൾ വന്നാൽ വീണ്ടും നാട്ടിൽ പെടുമോ എന്ന ആശങ്കയിലാണ് പലരും യാത്ര റദ്ദാക്കുന്നത്.കഴിഞ്ഞ തവണ യാത്രാനിയന്ത്രണങ്ങളെ തുടർന്ന് മാസങ്ങളോളം നാട്ടിൽ കുടുങ്ങിയ പലരും എൻട്രി പെർമിറ്റ്,ഹോട്ടൽ കൊറന്റൈൻ ഉൾപ്പെടെയുള്ള കടമ്പകൾ കടന്ന് ഒരു വിധത്തിലാണ് ഖത്തറിൽ തിരിച്ചെത്തിയത്. സമാനമായ അനുഭവം വീണ്ടും നേരിടേണ്ടി വരുമോ എന്നാണ് പലരും ഭയപ്പെടുന്നത്.
മെയ് അഞ്ചു വരെയാണ് യുഎഇയുടെ യാത്രാവിലക്ക്. എന്നാൽ ഇന്ത്യയിൽ കോവിഡ് വ്യാപനം നിയന്ത്രിക്കാൻ സാധിച്ചില്ലെങ്കിൽ വിലക്ക് അനിശ്ചിതകാലത്തേക്ക് തുടരാനാണ് സാധ്യത.. ഒമാൻ, സൗദി, കുവൈത്ത് എന്നിവിടങ്ങളിലെ യാത്രാവിലക്കും എത്രകാലം നീണ്ടുനിൽക്കും എന്ന കാര്യം വ്യക്തമല്ല. പ്രതിസന്ധി തുടർന്നാൽ പലരുടെയും ജോലിയെയും അതു ബാധിക്കും.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക
