September 13, 2019
September 13, 2019
ന്യുഡൽഹി : നഴ്സുമാരുടെ സംഘടനയായ യുണൈറ്റഡ് നഴ്സസ് അസോസിയേഷനിലെ സാമ്പത്തിക ക്രമക്കേട് കേസിൽ എഫ്.ഐ.ആര് റദ്ദാക്കാന് സുപ്രീംകോടതി വിസമ്മതിച്ചു. കേസില് നിഷ്പക്ഷ അന്വേഷണം നടക്കട്ടേയെന്ന് കോടതി നിലപാടെടുത്തു. ജസ്റ്റിസ് എല് നാഗേശ്വര് റാവുവിന്റെ നേതൃത്വത്തിലുള്ള ബെഞ്ചാണ് ഹരജി പരിഗണിച്ചിരുന്നത്.
ഇതോടെ എഫ്.ഐ.ആർ റദ്ധാക്കണമെന്നാവശ്യപ്പെട്ട് യു.എന്.എ സംസ്ഥാന പ്രസിഡന്റ് ഷോബി ജോസഫ് നൽകിയ ഹരജി പിന്വലിച്ചു. യു.എന്.എ ദേശീയ പ്രസിഡന്റ് ജാസ്മിന് ഷാ ഉള്പ്പെടെയുള്ള നാല് പ്രതികള് നല്കിയ ഹര്ജിയാണ് കോടതിയുടെ മുന്പിലെത്തിയത്. യു.എന്.എയുടെ ഫണ്ടില്നിന്ന് മൂന്നരക്കോടി രൂപ തട്ടിയെടുത്തുവെന്നാണ് കേസ്.
കേസ് തുടരുന്നതിനിടെ പ്രതികൾക്കെതിരെ പോലീസ് ലുക്ക് ഔട്ട് നോട്ടീസ് പുറപ്പെടുവിച്ചത് വിവാദമായിരുന്നു.ഇതേതുടർന്ന് താൻ ഖത്തറിലുണ്ടെന്ന് അറിയിച്ചു കൊണ്ട് ജാസ്മിൻ ഷാ ഫേസ്ബുക്കിൽ രംഗത്തെത്തിയിരുന്നു.