February 02, 2020
February 02, 2020
ന്യൂഡൽഹി : പ്രധാനമന്ത്രി നരേന്ദ്രമോദിയുടെ സുരക്ഷ ഉറപ്പാക്കാൻ സ്പെഷല് പ്രോട്ടക്ഷന് ഗ്രൂപ്പി (എസ്പിജി) ന് കേന്ദ്ര ബജറ്റില് നീക്കിയിരുത്തിയത് ഏകദേശം 600 കോടി രൂപ. പ്രധാനമന്ത്രി നരേന്ദ്ര മോദിക്കു മാത്രമാണു നിലവില് എസ്പിജി സുരക്ഷ എന്നിരിക്കെയാണ് ഈ കനത്ത നീക്കിയിരുപ്പ്.
കഴിഞ്ഞ സാമ്പത്തിക വര്ഷം പ്രഖ്യാപിച്ച ബജറ്റില് 420 മുതല് 540 കോടി രൂപ വരെയാണ് എസ്പിജിക്കു വേണ്ടി അനുവദിച്ചിരുന്നത്. കഴിഞ്ഞ നവംബറില് കോണ്ഗ്രസ് അധ്യക്ഷ സോണിയ ഗാന്ധി, കോണ്ഗ്രസ് നേതാക്കളായ പ്രിയങ്ക ഗാന്ധി, രാഹുല് ഗാന്ധി എന്നിവര്ക്കു നല്കിയിരുന്ന എസ്പിജി സുരക്ഷ പിന്വലിച്ചതോടെ നിലവില് പ്രധാനമന്ത്രിക്കു മാത്രമാണ് 3000 അംഗങ്ങളുള്ള എസ്പിജിയുടെ സുരക്ഷ ലഭിക്കുന്നത്. വിവിഐപികള്ക്ക് സുരക്ഷ ഒരുക്കാന് വിദേശത്തുനിന്നുള്പ്പെടെ പരിശീലനം നേടിയ വിദഗ്ധ സേനയാണ് എസ്പിജി. അര്ധ സുരക്ഷാസേനകളായ സിആര്പിഎഫ്, സിഐഎസ്എഫ്, ഐടിബിപി എന്നിവയില് നിന്നുള്ളവരെയാണ് എസ്പിജിയിലേക്കു തെരഞ്ഞെടുക്കുന്നത്.