July 11, 2020
July 11, 2020
തിരുവനന്തപുരം : വിവാദമായ തിരുവനന്തപുരം വിമാനത്താവള സ്വര്ണ്ണക്കടത്ത് കേസില് കസ്റ്റംസ് തിരയുന്ന പ്രധാന കണ്ണികളായ സ്വപ്ന സുരേഷിനെയും സന്ദീപ് നായരെയും എൻ.ഐ.എ കസ്റ്റഡിയിൽ എടുത്തു.ബംഗളുരുവിൽ വെച്ചാണ് ഇവരെ അറസ്റ്റ് ചെയ്തത്. ബെംഗളൂരുവിലെ എലഹങ്കയില് എൻ.ഐ.ഐ സംഘമാണ് പിടികൂടിയത്. നാളെ പ്രതികളെ കൊച്ചിയിലെത്തിക്കും.
സ്വര്ണക്കള്ളക്കടത്തുമായി ബന്ധപ്പെട്ട് എന്.ഐ.എയുടെ എഫ്ഐആറിൽ നാല് പ്രതികളാണ് ഉള്ളത്. ഒന്നാം പ്രതി കേസില് അറസ്റ്റിലായ സരിത്, രണ്ടാം പ്രതി സ്വപ്ന സുരേഷ്, മൂന്നാം പ്രതി ഫൈസല് പരീത്, നാലാം പ്രതി സ്വപ്നയുടെ ബിസിനസ് പങ്കാളിയായ സന്ദീപ് നായര് എന്നിവരാണുള്ളത്. കേസിൽ നേരത്തെ എൻ.ഐ.എ യു.എ.പി.എ ചുമത്തിയിരുന്നു. യു.എ.പി.എ 16, 17, 18 വകുപ്പുകള് ചുമത്തിയതായാണ് എന്.ഐ.എ ഹൈക്കോടതിയില് അറിയിച്ചത്. കേസ് അന്വേഷിക്കാനുള്ള എൻ.ഐ.എ തീരുമാനം യു.എ.ഇയെ അറിയിച്ചു.
കൊച്ചി യൂണിറ്റിനായിരിക്കും അന്വേഷണ ചുമതല. തീവ്രവാദ ബന്ധവും സാമ്പത്തിക ഇടപാടുകളും അന്വേഷിക്കുമെന്ന് എൻ.ഐ.എ പറഞ്ഞു. സന്ദീപിനും സരിത്തിനും സ്വപ്നക്കും കുറ്റകൃത്യത്തില് പങ്കുണ്ടെന്നും എൻ.ഐ.എ പറഞ്ഞു. കേസ് ഇനി 14ാം തിയ്യതി കോടതി പരിഗണിക്കും.
ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക