January 04, 2021
January 04, 2021
ഫയൽ ഫോട്ടോ
ദോഹ : ഖത്തറിനായി തങ്ങളുടെ വ്യോമപാത തുറക്കാനും ഖത്തറിനും ഈജിപ്തിനുമിടയിൽ വിമാനസർവീസുകൾ പുനരാരംഭിക്കാനും ഈജിപ്ഷ്യൻ പ്രസിഡന്റ് അബ്ദുൽ ഫത്തേഹ് അൽ സിസി സന്നദ്ധത അറിയിച്ചതായി അൽ-അറബി അൽ-ജദീദ് ന്യൂസ് റിപ്പോർട്ട് ചെയ്തു.കഴിഞ്ഞ കുറച്ചു നാളുകളായി ഈജിപ്തിന്റെ നിലപാടിൽ ഗണ്യമായ മാറ്റമുണ്ടായതായും അബുദാബിക്ക് പകരം റിയാദുമായി കൂടുതൽ അടുക്കാനാണ് ഈജിപ്ത് നിലവിൽ ശ്രമിക്കുന്നതെന്നും ചില ഉന്നത വൃത്തങ്ങൾ വെളിപ്പെടുത്തിയതായാണ് റിപ്പോർട്ടിൽ പറയുന്നത്.ജനുവരി 5 ന് സൗദിയിലെ അൽ-ഉലയിൽ നടക്കാനിരിക്കുന്ന 41 മത് ജി.സി.സി ഉച്ചകോടിയിൽ പങ്കെടുക്കാൻ ഈജിപ്ത് പ്രസിഡന്റ് സൗദി അറേബ്യയിലേക്ക് പോകുമെന്ന് റിപ്പോർട്ടുകൾ പുറത്തുവന്നതിന് തൊട്ടുപിന്നാലെയാണ് ഈ പരാമർശം.
ഖത്തർ-സൌദി അതിർത്തിയായ അബു സമ്ര (സാൽവ കോസിങ്) മൂന്ന് വർഷത്തെ ഇടവേളയ്ക്ക് ശേഷം വീണ്ടും തുറക്കാൻ ഒരുക്കങ്ങൾ നടക്കുന്നതായി നേരത്തെ ദോഹ ന്യൂസ് റിപ്പോർട്ട് ചെയ്തിരുന്നു.എന്നാ ഈ വർത്തകൾക്കൊന്നും ഇതുവരെ ഔദ്യോഗിക സ്ഥിരീകരണമുണ്ടായിട്ടില്ല.
ഇതിനിടെ,നാളെ റിയാദിൽ നടക്കാനിരിക്കുന്ന ഗൾഫ് ഉച്ചകോടിയിൽ ഖത്തർ അമീർ പങ്കെടുക്കുമോ എന്ന കാര്യത്തിൽ ഇതുവരെ വ്യക്തത ലഭിച്ചിട്ടില്ല.അമീർ ഉച്ചകോടിയിൽ പങ്കെടുക്കുകയാണെങ്കിൽ അത് പ്രശ്നപരിഹാരത്തിനുള്ള നിർണായക ചുവടുവെപ്പാവുമെന്നാണ് വിലയിരുത്തൽ.അമീര്‍ പങ്കെടുക്കുമോയെന്ന കാര്യം ഔദ്യോഗികമായി ഇതുവരെ ഖത്തര്‍ പുറത്തുവിട്ടിട്ടില്ലെങ്കിലും ഖത്തർ ഉൾപ്പെടെ എല്ലാ ജിസിസി രാജ്യങ്ങളിലെയും രാഷ്ട്ര തലവന്മാർ ഉച്ചകോടിയിൽ പങ്കെടുക്കുമെന്നാണ് ഗൾഫ് സഹകരണ കൗൺസിലുമായി അടുത്ത വൃത്തങ്ങൾ നൽകുന്ന സൂചന. സൗദി രാജാവിന്റെ ക്ഷണക്കത്ത് ഖത്തര്‍ അമീര്‍ നേരിട്ട് സ്വീകരിച്ചതില്‍ പ്രതീക്ഷയുണ്ടെന്ന് രാഷ്ട്രീയ നിരീക്ഷകര്‍ വിലയിരുത്തുന്നു. ഏതായാലും ഇന്ന് രാത്രി തന്നെ ഖത്തറിന്റെ ഭാഗത്ത് നിന്ന് ഇതുസംബന്ധിച്ച ഔദ്യോഗിക അറിയിപ്പ് ഉണ്ടാകുമെന്നാണ് ലഭിക്കുന്ന വിവരം.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക
