September 18, 2019
September 18, 2019
മസ്കത്ത് : ഒമാനിൽ സ്വദേശി കുടുംബത്തെ കൊലപ്പെടുത്തിയതായി സംശയിക്കുന്ന പ്രതി ഇന്ത്യയിൽ പിടിയിലായതായി സൂചന.ഇന്ത്യൻ പോലീസ് സമൂഹ മാധ്യമങ്ങളിലൂടെയാണ് ഇക്കാര്യം അറിയിച്ചത്.ഗുജറാത്ത് ആന്റി സ്‌ക്വാഡ് അഹമ്മദാബാദിൽ വെച്ചാണ് ഇയാളെ പിടികൂടിയതെന്നാണ് വിവരം.
ഒമാനിലെ ബിദിയയിൽ കഴിഞ്ഞ ഓഗസ്റ്റിലാണ് അഞ്ചു പേരടങ്ങുന്ന ഒമാനി കുടുംബത്തെ വീട്ടിൽ മരിച്ച നിലയിൽ കണ്ടെത്തിയത്.അഭിഭാഷകനായ ഒമാൻ പൗരനും ഭാര്യയും മൂന്നു മക്കളുമാണ് കൊല്ലപ്പെട്ടത്.കൊലപാതകത്തിന് ശേഷം ഏഷ്യൻ വംശജരായ പ്രതികൾ രാജ്യം വിട്ടതായി ഒമാൻ റോയൽ പോലീസ് അറിയിച്ചിരുന്നു.
പ്രതികൾ ഇന്ത്യയിൽ നിന്നുള്ളവരാണെന്ന സംശയത്തെ തുടർന്ന് ഇവരെ കുറിച്ചുള്ള വിവരങ്ങൾ ഒമാൻ റോയൽ പോലീസ് ഇന്ത്യക്ക് കൈമാറിയിരുന്നു.പ്രതികളെ പിടികൂടാൻ ഒമാൻ റോയൽ പോലീസ് ഇന്റർപോളിന്റെ സഹായവും തേടിയിരുന്നു.
പ്രതിയെ കുറിച്ചുള്ള കൂടുതൽ വിവരങ്ങൾ ലഭ്യമായിട്ടില്ല.
