December 22, 2019
December 22, 2019
കരുവാരക്കുണ്ട് : വയനാട്ടിൽ രാഹുൽഗാന്ധിയുടെ പ്രസംഗം പരിഭാഷപ്പെടുത്തിയതിലൂടെ ശ്രദ്ധേയയായ കരുവാരക്കുണ്ട് ഗവണ്മെന്റ് ഹൈസ്‌കൂൾ പ്ലസ് റ്റു വിദ്യാർത്ഥിനി സഫ ഫെബിനെതിരെ വ്യാജപ്രചാരണവുമായി ഡല്‍ഹി എംഎല്‍എ മഞ്ജീന്ദർ സിങ് സിർസ രംഗത്ത്. പൗരത്വ ഭേദഗതി നിയമത്തിനെതിരെ രാജ്യത്ത് നടക്കുന്ന പ്രതിഷേധങ്ങൾക്ക് പിന്നിൽ സഫയും രാഹുൽ ഗാന്ധിയുമാണെന്നാണ് മൻജീന്ദർ സിർസ ആരോപിച്ചത്. വ്യാജപ്രചാരണം നടത്തിയ എൻഡിഎ എംഎൽഎക്കെതിരെ സഫയുടെ പിതാവ് കുഞ്ഞുമുഹമ്മദ് മുസ്ലിയാർ കരുവാരക്കുണ്ട് സ്റ്റേഷനിൽ പരാതി നൽകിയിട്ടുണ്ട്.
മഞ്ജീന്ദർ സിങ് സിർസ മകൾക്കെതിരെ വ്യാജപ്രചാരണം നടത്തുന്നുവെന്നും ഇത് തനിക്കും വിദ്യാർത്ഥിനിയായ തന്റെ മകൾക്കും തങ്ങളുടെ കുടുംബത്തിനും മാനഹാനി ഉണ്ടാക്കുന്നുണ്ടെന്നും അദ്ദേഹം പരാതിയിൽ രേഖപ്പെടുത്തിയിട്ടുണ്ട്. എംഎൽഎ യുടെ പരാമർശം തുടർജീവിതത്തിനു തടസം സൃഷ്ടിക്കുമെന്നും തങ്ങളുടെ ജീവനും സ്വത്തിനും ഭീഷണി നേരിടേണ്ടി വരുമോ എന്ന് ഭയപ്പെടുകയാണെന്നും പരാതിയിൽ പറയുന്നുണ്ട്.ട്വിറ്റർ വഴിയാണ് മൻജീന്ദർ സിങ് സഫക്കെതിരെ അടിസ്ഥാനരഹിതമായ ആരോപണം ഉന്നയിച്ചത്.
