July 27, 2020
July 27, 2020
ഫോട്ടോ : ഗൾഫ് ന്യൂസ്,ദുബായ്
ഷാർജ : യുഎഇയിലെ ഷാർജയിൽ മലയാളി വിദ്യാര്ഥിനി കെട്ടിടത്തില് നിന്നു വീണു മരിച്ചു. അജ്മാന് ഭവന്സ് സ്കൂളിലെ പത്താംക്ലാസ് വിദ്യാര്ഥിനി സമീക്ഷ പോള് (14) ആണു മരിച്ചത്. എറണാകുളം പെരുമ്പാവൂർ വേങ്ങൂര് സ്വദേശി ബിനു പോള്- മേരി ദമ്പതികളുടെ മകളാണ്.
ഞായറാഴ്ച പുലര്ച്ചെയാണ് ഷാര്ജ അല് താവുനിലെ ഇവര് താമസിക്കുന്ന കെട്ടിടത്തിന്റെ എട്ടാംനിലയിലെ ബാല്ക്കണിയില് നിന്ന് സമീക്ഷ താഴേക്കു വീണത്. ഈ സമയം മാതാപിതാക്കളും ഇരട്ടസഹോദരിയായ മെറിഷും ഉറങ്ങുകയായിരുന്നു. ഇന്റര്ലോക്ക് പാകിയ നിലത്തേക്കു തലയിടിച്ചുവീണ സമീക്ഷ തല്ക്ഷണം മരിച്ചു. സഹോദരി മെറിഷിനൊപ്പമാണ് സമീക്ഷ ഉറങ്ങാന് കിടന്നത്.
താമസസ്ഥലത്തെ സെക്യൂരിറ്റി അറിയിച്ചതിനെ തുടര്ന്ന് പൊലീസ് ഉടന് തന്നെ സ്ഥലത്തെത്തി. പൊലീസാണ് സമീക്ഷയുടെ മാതാപിതാക്കളെ വിവരം അറിയിച്ചത്.
മരണത്തില് ദുരൂഹതയുണ്ടോയെന്ന് പൊലീസ് പരിശോധിക്കുന്നുണ്ട്. സംഭവത്തില് ഫോറന്സിക് വിഭാഗവും പരിശോധന നടത്തി. പൊലീസ് മാതാപിതാക്കളെ ചോദ്യം ചെയ്തു. ദുബായില് എഞ്ചിനിയറായി ജോലി ചെയ്യുകയാണ് ബിനു പോള്. 16 വര്ഷം ഇയാള് അബുദാബിയിലാണ് ജോലി ചെയ്തത്. ഒന്നര വര്ഷം മുമ്പാണ് ഷാര്ജയിലെ ഇപ്പോഴത്തെ താമസസ്ഥലത്തെ അപ്പാര്ട്ട്മെന്റിലേക്ക് മാറിയത്.
ന്യൂസ്റൂം വാർത്തകൾക്കുള്ള ഗ്രൂപ്പുകളിൽ ചേരാൻ +974 66200167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക