April 17, 2020
April 17, 2020
കുവൈത്ത് സിറ്റി : കുവൈത്തിൽ കോവിഡ് മരണം കൂടുന്നു. ഇന്ന് രണ്ടു പേർ കൂടി മരിച്ചതോടെ മരണ സംഖ്യ അഞ്ചായി. നേരത്തെ രണ്ടു കുവൈത്ത് പൗരന്മാരും ഒരു ഇന്ത്യക്കാരനും കോവിഡ് മൂലം മരിച്ചിരുന്നു .58 വയസ്സുള്ള കുവൈത്ത് പൗരനും 69 കാരനായ ഇറാനിയുമാണ് ഇന്ന് മരിച്ചത്.
134 പേർക്ക് കൂടി പുതുതായി കോവിഡ്19 സ്ഥിരീകരിച്ചതായും ആരോഗ്യമന്ത്രാലയം അറിയിച്ചു . ഇതോടെ രാജ്യത്തെ കോവിഡ് കേസുകളുടെ എണ്ണം 1658 ആയി. ഇന്ന് രോഗം സ്ഥിരീകരിച്ചവരിൽ 64 പേർ ഇന്ത്യക്കാരാണ്. ഇതോടെ രാജ്യത്തെ കോവിഡ് ബാധിതരായ ഇന്ത്യക്കാരുടെ എണ്ണം 924 ആയി. പുതിയ രോഗികളിൽ 63 ഇന്ത്യക്കാർ ഉൾപ്പെടെ 126 പേർക്കു നേരത്തെ കോവിഡ് സ്ഥിരീകരിച്ചവരുമായുള്ള സമ്പർക്കത്തെ തുടർന്നാണ് വൈറസ് ബാധിച്ചത്. ഒരു ഇന്ത്യക്കാരൻ ഉൾപ്പെടെ 5 പേർക്ക് രോഗം ബാധിച്ചത് എങ്ങിനെയെന്ന് വ്യക്തമായിട്ടില്ല. ബ്രിട്ടൻ,ഇറാൻ, സൗദി അറേബ്യഎന്നിവിടങ്ങളിൽ നിന്നും മടങ്ങിയെത്തിയ 3 പൗരന്മാർക്കും ഇന്ന് പുതുതായി കോവിഡ് സ്ഥിരീകരിച്ചിട്ടുണ്ട്.
ചികിത്സയിലുണ്ടായിരുന്നവരിൽ 33 പേർ കൂടി രോഗമുക്തി നേടിയതായും ആരോഗ്യമന്ത്രാലയം അറിയിച്ചു. ഇതോടെ രാജ്യത്തു കോവിഡ് രോഗം ഭേദമായവരുടെ എണ്ണം 258 ആയി. നിലവിൽ 1395 പേരാണ് ചികിത്സയിലുള്ളത്. ഇതിൽ 32 പേർ തീവ്രപരിചരണ വിഭാഗത്തിലാണ്. പതിനാറു പേരുടെ നില ഗുരുതരമാണെന്നും വാർത്താസമ്മേളനത്തിൽ അറിയിച്ചു .
ന്യുസ്റൂം വാർത്തകൾ മുടങ്ങാതെ വാട്സ്ആപ്പിൽ ലഭിക്കാൻ +974 66200167 എന്ന ഖത്തർ വാട്സ് ആപ് നമ്പറിലേക്ക് സന്ദേശമയക്കുക.