September 07, 2019
September 07, 2019
കുവൈത്ത് സിറ്റി : കുവൈത്തിൽ 12 വയസ്സ് കഴിഞ്ഞ കുട്ടികള്‍ക്ക് ആശ്രിത വിസ നല്‍കില്ലെന്ന പ്രചാരണം അടിസ്ഥാനമില്ലാത്തതാണെന്നും പുതുതായി അത്തരമൊരു തീരുമാനമെടുത്തിട്ടില്ലെന്നും താമസാനുമതികാര്യ വിഭാഗം അറിയിച്ചു. ഇതുമായി ബന്ധപ്പെട്ട് മാധ്യമങ്ങളില്‍ പ്രചരിക്കുന്നത് തെറ്റായ വിവരങ്ങളാണെന്ന് അധികൃതർ വ്യക്തമാക്കി.
കുടുംബ വിസ ലഭിക്കാന്‍ കുടുംബനാന്റെ കുറഞ്ഞ വേതനം 500 ദിനാർ ആയിരിക്കണമെന്ന തീരുമാനം മാത്രമേ പുതുതായി കൊണ്ടുവന്നിട്ടുള്ളൂവെന്നും താമസാനുമതികാര്യ വിഭാഗം അറിയിച്ചു. നേരത്തേ അത് 450 ദീനാര്‍ ആയിരുന്നു. കുവൈത്തിലെ പ്രമുഖ പ്രാദേശിക പത്രത്തില്‍ വന്ന വാര്‍ത്തയെ അടിസ്ഥാനമാക്കിയാണ് മറ്റു മാധ്യമങ്ങളും ഈ വാർത്ത നൽകിയത്. ഇതേതുടർന്ന് നിരവധി പേര്‍ ആശങ്കയിലായിരുന്നു. വര്‍ഷങ്ങളായി സകുടുംബം രാജ്യത്ത് താമസിക്കുന്ന വിദേശികള്‍ വാര്‍ത്തയുടെ നിജസ്ഥിതി തേടി നിരവധി അന്വേഷണങ്ങളും നടത്തിയിരുന്നു. എന്നാല്‍, വാർത്ത നിഷേധിച്ചു അധികൃതർ രംഗത്തെത്തിയതോടെ കുവൈത്തിലെ മലയാളികൾ ഉൾപ്പെട്ട വിദേശികൾ ആശ്വാസത്തിലാണ്.
18ന് മീതെ പ്രായമുള്ള കുട്ടികള്‍ കുവൈത്തിലോ വിദേശത്തോ പഠനം നടത്തുകയാണെങ്കില്‍ അക്കാര്യം തെളിയിക്കുന്ന സര്‍ട്ടിഫിക്കറ്റ് ഹാ‍ജരാക്കിയാല്‍ ഇഖാമ പുതുക്കാന്‍ കഴിയുമെന്നും അധികൃതർ വ്യക്തമാക്കി..
