July 07, 2021
July 07, 2021
അബൂദബി: അബുദാബിയിലെ യാസ് ദ്വീപില് ഉണ്ടായ വാഹനാപകടത്തില് മലയാളി വിദ്യാര്ഥി മരിച്ചു. കണ്ണൂര് തളിപ്പറമ്പിന് സമീപം പുതിയതെരു സ്വദേശിയും ഇത്തിസാലാത്തിലെ എന്ജിനീയറിങ് ടെക്നോളജി വിഭാഗം ഉദ്യോഗസ്ഥനുമായ അജ്മല് റഷീദിന്റെയും നബീലയുടെയും മകൻ മുഹമ്മദ് ഇബാദ് അജ്മല് (18) ആണ് മരിച്ചത്. യു.കെയില് എയര്ക്രാഫ്റ്റ് മെയിന്റനന്സ് എന്ജിനീയറിങ് ഒന്നാം വര്ഷ വിദ്യാര്ഥിയായിരുന്നു.
ബുധനാഴ്ച രാവിലെ എട്ടിനായിരുന്നു അപകടം. അജ്മല് ഡ്രൈവ് ചെയ്ത കാര് റോഡരികിലെ മരത്തിലിടിച്ചാണ് അപകടമുണ്ടായതെന്ന് പൊലീസ് പറഞ്ഞു. പൊലീസ് ഉടന് അബൂദബി ശൈഖ് ഷഖ്ബൂത്ത് മെഡിക്കല് സിറ്റിയിലിലെത്തിച്ചെങ്കിലും മരണം സംഭവിച്ചിരുന്നു.
പത്താം ക്ലാസ് വരെ അബൂദബി ഇന്ത്യന് സ്കൂളിലും ഹയര് സെക്കന്ററി വിദ്യാഭ്യാസം അബൂദബി ബ്രൈറ്റ് റൈഡേഴ്സ് സ്കൂളിലുമായിരുന്നു. യു.കെയിലെ സൗത്ത് വെയില്സ് സര്വകലാശാലയിലെ കാര്ഡിഫ് കാമ്ബസില് നിന്ന് അവധിക്ക് ഒരു മാസം മുന്പാണ് അബൂദബിയിലെ മാതാപിതാക്കള്ക്കരികിലെത്തിയത്. പ്രഭാത നമസ്കാരത്തിനുശേഷം കാറുമായി പുറത്തുപോയപ്പോഴാണ് അപകടം. സഹോദരങ്ങള്: നൂഹ, ആലിയ, ഒമര്. ഖബറടക്കം അബൂദബി ബനിയാസില്.