December 28, 2020
December 28, 2020
ദോഹ : രണ്ടു ദിവസത്തെ ഔദ്യോഗിക സന്ദർശനത്തിനായി ദോഹയിൽ എത്തിയ ഇന്ത്യൻ വിദേശകാര്യ മന്ത്രി എസ്.ജയശങ്കർ ഫിഫ ലോകകപ്പിനായി നിർമിച്ച റയ്യാൻ അഹമദ് ബിൻ അലി സ്റ്റേഡിയം സന്ദർശിച്ചു.ഇന്ത്യൻ സ്ഥാനപതി ഡോ.ദീപക് മിത്തലും അദ്ദേഹത്തോടൊപ്പം ഉണ്ടായിരുന്നു. ലോകകപ്പ് സി.ഇ.ഒ ഹസ്സൻ അൽതാവാദി,നാസർ അൽ ഖാതിർ എന്നിവർ ചേർന്ന് സ്റ്റേഡിയത്തിലെ സൗകര്യങ്ങളും സംവിധാനങ്ങളും മന്ത്രിക്ക് പരിചയപ്പെടുത്തി.
സ്റ്റേഡിയത്തിന്റെ നിർമാണത്തിൽ പങ്കാളിയായ ഇന്ത്യൻ കമ്പനിയായ ലാർസൻ ആൻഡ് ടൂബ്രോയെയും അവരുടെ ഖത്തർ പങ്കാളിയെയും അഭിനന്ദിക്കുന്നതായി പിന്നീട് എസ്.ജയശങ്കർ ട്വീറ്റ് ചെയ്തു.ഇന്ത്യയുടെ മികവിന്റെയും പ്രവർത്തനക്ഷമതയുടെയും തെളിവാണ് സ്റ്റേഡിയമെന്നും ഫിഫാ ലോകകപ്പിന് എല്ലാ ആശംസകൾ നേരുന്നതായും അദ്ദേഹം ട്വീറ്റ് ചെയ്തു.
വാണിജ്യ,സാംസ്‌കാരിക രംഗങ്ങളിൽ ഇന്ത്യയും ഖത്തറും തമ്മിൽ നൂറ്റാണ്ടുകളായി തുടരുന്ന അടുത്ത ബന്ധമാണുള്ളതെന്നും റയ്യാൻ സ്റ്റേഡിയം ഈ അടുത്ത ബന്ധത്തിന്റെ പ്രതീകമാണെന്നും ലോകകപ്പ് സി.ഇ.ഓ ഹസ്സൻ അൽ തവാദി പറഞ്ഞു.
ഇന്ത്യൻ കമ്പനിയുടെ പങ്കാളിത്തത്തോടെ നിർമാണം പൂർത്തിയാക്കിയ അഹമദ് ബിൻ അലി സ്റ്റേഡിയം ഇക്കഴിഞ്ഞ ഡിസംബർ 18ന് ദേശീയ ദിനത്തിൽ അമീർ കപ്പ് ഫൈനൽ മത്സരത്തോടെയാണ് കളിയാരാധകർക്കായി തുറന്നുകൊടുത്തത്.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക
