December 01, 2020
December 01, 2020
ദോഹ: സ്കൈട്രാക്സിന്റെ കൊവിഡ്-19 വിമാനത്താവള സുരക്ഷാ റേറ്റിങ്ങില് മികച്ച നേട്ടവുമായി ദോഹയിലെ ഹമദ് അന്താരാഷ്ട്ര വിമാനത്താവളം (എച്ച്.ഐ.എ). ഫൈവ് സ്റ്റാര് റേറ്റിങ്ങാണ് ഹമദ് അന്താരാഷ്ട്ര വിമാനത്താവളത്തിന് ലഭിച്ചത്. ഈ നേട്ടം കൈവരിക്കുന്ന മിഡില് ഈസ്റ്റിലെയും ഏഷ്യയിലെയും ആദ്യ വിമാനത്താവളമാണ് ദോഹയിലേത്.
ഹമദ് വിമാനത്താവളത്തില് ഖത്തര് നടപ്പാക്കിയ കൊവിഡ് സുരക്ഷാ മാനദണ്ഡങ്ങളെ സ്കൈട്രാക്സിന്റെ കൊവിഡ്-19 സുരക്ഷാ മാനദണ്ഡങ്ങളുമായി താരതമ്യം ചെയ്ത് എത്രത്തോളം കാര്യക്ഷമമാണെന്ന് വിലയിരുത്തിയ ശേഷമാണ് റേറ്റിങ് നല്കിയത്. മൂന്നു ദിവസം നീണ്ട കൊവിഡ്-19 ഓണ്സൈറ്റ് ഓഡിറ്റ് ഹമദ് വിമാനത്താവളത്തില് നടത്തിയത് ഒക്ടോബറിലാണ്.
നടപടിക്രമങ്ങളുടെ കാര്യക്ഷമതാ പരിശോധന, നേരിട്ടുള്ള നിരീക്ഷണവും വിശകലനവും, ഉപരിതലങ്ങളിലെ മലിനീകരണം അളക്കാനുള്ള എ.ടി.പി സാംപ്ലിങ് പരിശോധനകള് എന്നിവ അടിസ്ഥാനമാക്കിയാണ് റേറ്റിങ് നിശ്ചയിച്ചത്. ഈ മാനദണ്ഡങ്ങളുടെ സ്ഥിരതയും റേറ്റിങ്ങില് പ്രധാന ഘടകമാണ്.
ശാരീരിക അകലം പാലിക്കുന്നതിനുള്ള പ്രോട്ടോക്കോളുകളുടെ പ്രായോഗികതയും ഇത് എത്രത്തോളം ഫലപ്രദമാണെന്നും ഓഡിറ്റില് വിലിരുത്തി. കൈകള് വൃത്തിയാക്കാനായി എച്ച്.ഐ.എ ടെര്മിനലില് ഉടനീളമുള്ള സംവിധാനങ്ങളുടെ ലഭ്യതയും ഗുണനിലവാരവും ഫലപ്രാപ്തിയും ഓഡിറ്റില് പരിശോധിച്ചു. വിമാനത്താവളത്തിന്റെ ശുചിത്വവും ഓഡിറ്റില് പരിശോധിച്ചു.
വ്യക്തിഗത സുരക്ഷ പാലിക്കാനുള്ള ഉപകരണങ്ങളുടെ (പി.പി.ഇ) മാനദണ്ഡങ്ങളും അവ എത്രത്തോളം ഉപയോഗിക്കുന്നുവെന്നും ഓഡിറ്റിങ്ങില് പരിശോധിച്ചു. താപനില പരിശോധിച്ച് സ്ക്രീന് ചെയ്യാനുള്ള നടപടികള്, ഫെയിസ് മാസ്കുകളുടെ ഉപയോഗം തുടങ്ങിയ നിരവധി കാര്യങ്ങള് പരിശോധിച്ചാണ് എച്ച്.ഐ.എയ്ക്ക് ഫൈവ് സ്റ്റാര് റേറ്റിങ് നല്കിയത്.
'ഞങ്ങളുടെ കൊവിഡ്-19 നയങ്ങളും പ്രോട്ടോക്കോളുകളും സ്കൈട്രാക്സ് അംഗീകരിച്ചതില് ഞങ്ങള്ക്ക് അഭിമാനമുണ്ട്. മിഡില് ഈസ്റ്റിലും ഏഷ്യയിലും ഫൈവ് സ്റ്റാര് കൊവിഡ് സേഫ്റ്റി റേറ്റിങ് ലഭിക്കുന്ന ആദ്യ വിമാനത്താവളമാണ് എച്ച്.ഐ.എ. 2014 ല് ഉദ്ഘാടനം ചെയ്തതു മുതല് ഹമദ് അന്താരാഷ്ട്ര വിമാനത്താവളത്തിന്റെ സ്വയം വിലയിരുത്തലില് സ്കൈട്രാക്സ് റാങ്കിങ് എല്ലായ്പ്പോഴും പ്രധാന പങ്ക് വഹിച്ചിട്ടുണ്ട്. തുടര്ച്ചയായി നാലാം വര്ഷവും സ്കൈട്രാക്സിന്റെ ഫൈവ് സ്റ്റാര് റേറ്റിങ് ലഭിച്ചതിലും കൊവിഡ്-19 സുരക്ഷയില് ഫൈവ് സ്റ്റാര് റേറ്റിങ് ലഭിച്ചതിലും ഞങ്ങള്ക്ക് അതിയായ അഭിമാനമുണ്ട്.' -ഹമദ് അന്താരാഷ്ട്രവിമാനത്താവളത്തിന്റെ ചീഫ് ഓപ്പറേറ്റിങ് ഓഫീസറായ എഞ്ചിനീയര് ബദര് മുഹമ്മദ് അല് മീര് പറഞ്ഞു.
ന്യൂസ്റൂം വാർത്തകൾ ടെലിഗ്രാമിൽ ലഭിക്കാൻ ഇവിടെ ക്ലിക്ക് ചെയ്യുക.