October 30, 2019
October 30, 2019
ദോഹ: ഖത്തറിലെ ഏറ്റവും വലിയ ഇന്റര്‍ചേഞ്ച് ആയ ഉം ലഖ്ബ മേൽപാലം(ലാൻഡ്മാർക്ക് ഇന്റർചേഞ്ച്) നവംബർ 2 ന് യാത്രക്കാർക്കായി തുറക്കുമെന്ന് അശ്ഗാൽ അറിയിച്ചു. സബാഹ് അൽ അഹ്‌മദ്‌ കോറിഡോർ പദ്ധതിയുടെ ഭാഗമായുള്ള മേൽപ്പാലത്തിന്റെ മൊത്തം ദൈർഘ്യം 820 മീറ്ററാണ്. പദ്ധതിയുടെ ഭാഗമായി നിർമിക്കുന്ന ഒൻപത് മേൽപാലങ്ങളിൽ ആദ്യത്തേതാണ് ശനിയാഴ്ച തുറക്കുന്നത്. ഇതോടെ അൽ ഗരാഫയ്ക്കും ദോഹയ്ക്കുമിടയിൽ ഗതാഗതം സുഗമമാകും. ഖത്തറില്‍ അടിസ്ഥാനസൗകര്യ വികസനത്തിന്റെ ചരിത്രത്തില്‍ ഒരു നാഴികക്കല്ലാണ് ഉം ലഖ്ബ ഇന്റര്‍ചേഞ്ച്.
പതിനൊന്ന് കിലോമീറ്റര്‍ നീളമുള്ള ഇന്റര്‍ചേഞ്ചില്‍ ഒന്‍പത് മേൽപാലങ്ങള്‍ ഉണ്ടായിരിക്കും. ഒരു മണിക്കൂറില്‍ 20,000 വാഹനങ്ങള്‍ക്ക് കടന്നുപോവാന്‍ സൗകര്യമുണ്ടായിരിക്കും. ലാന്‍ഡ്മാര്‍ക്ക് ഇന്റര്‍സെക്ഷന്‍ എന്ന പേരിൽ കൂടി അറിയപ്പെടുന്ന ഈ ഇന്റര്‍ചേഞ്ച് പൂർണമായും ഗതാഗത സജ്ജമായാൽ ദോഹയിലെ ഗതാഗത കുരുക്കിന് ഒരു പരിധി വരെ പരിഹാരമാകുമെന്നാണ് പ്രതീക്ഷ.
2021ല്‍ നിര്‍മാണം പൂര്‍ത്തീകരിക്കുന്ന ഇന്റര്‍ചേഞ്ചിന്റെ ചില ഭാഗങ്ങള്‍ ഈ വര്‍ഷം അവസാനം തുറന്നുകൊടുക്കുമെന്നും ബാക്കി ഭാഗങ്ങള്‍ പണി പൂര്‍ത്തിയാകുന്ന മുറയ്ക്ക് തുറന്നുകൊടുക്കുമെന്നും അശ്ഗാല്‍ വൃത്തങ്ങള്‍ നേരത്തെ അറിയിച്ചിരുന്നു. ദോഹ എക്സ്പ്രസ് വെയിലെ, പ്രത്യേകിച്ചും 22 ഫെബ്രുവരി സ്ട്രീറ്റുമായി ബന്ധപ്പെട്ട ഗതാഗതക്കുരുക്ക് പരിഹരിക്കാന്‍ പുതിയ ഇന്റര്‍ചേഞ്ച് സഹായിക്കും. ആയിരക്കണക്കിനു യാത്രക്കാര്‍ക്ക് ഇത് ഉപകരിക്കും.
ജനസാന്ദ്രതയുള്ളതും പ്രധാനപ്പെട്ട മാളുകളടക്കം നിരവധി വാണിജ്യസ്ഥാപനങ്ങളും സര്‍ക്കാര്‍ ഓഫിസുകളും വിദ്യാഭ്യാസ-ആരോഗ്യ സ്ഥാപനങ്ങളും സ്ഥിതിചെയ്യുന്ന സ്ഥലത്താണ് ഇന്റര്‍ചേഞ്ച് നിർമിക്കുന്നത്.
