April 11, 2020
April 11, 2020
തിരുവനന്തപുരം : കോവിഡ് ബാധിച്ചു പരിയാരം മെഡിക്കൽ കോളേജിൽ ചികിത്സയിലായിരുന്ന മാഹി സ്വദേശി മരിച്ചു. മാഹി ചെറുകല്ലായി സ്വദേശി പി മെഹ്റൂഫ് (71) ആണ് മരിച്ചത്. ഇയാള്ക്ക് എവിടെ നിന്നാണ് രോഗം ബാധിച്ചതെന്ന് വ്യക്തമായിട്ടില്ല.
മാര്ച്ച് 23നാണ് ഇയാള്ക്ക് പനി വന്നത്. തലശ്ശേരിയിലെ സ്വകാര്യ ആശുപത്രിയില് ചികിത്സ തേടിയെങ്കിലും അസുഖം മാറാതിരുന്നതിനെ തുടര്ന്ന് കണ്ണൂരിലെ സ്വകാര്യ ആശുപത്രിയിലേക്ക് മാറ്റുകയായിരുന്നു.
ഏപ്രില് ആറിനാണ് മെഹ്റൂഫിന്റെ സ്രവം പരിശോധനക്ക് അയച്ചത്. ഒന്പതാം തിയ്യതി പരിശോധനാഫലം ലഭിച്ചതിനെ തുടര്ന്ന് പരിയാരം മെഡിക്കല് കോളജിലെ വെന്റിലേറ്ററിലേക്ക് മാറ്റി. ആരോഗ്യനില അന്ന് മുതല് തന്നെ അതീവ ഗുരുതരമായിരുന്നു.
നിരവധി അസുഖങ്ങൾ നേരിട്ടിരുന്ന ഇദ്ദേഹത്തെ ഗുരുതരമായ അസുഖങ്ങളോടെയാണ് ആശുപത്രിയിൽ പ്രവേശിപ്പിച്ചിരുന്നതെന്നും 83 പേരുമായി ഇയാൾ സമ്പർക്കം പുലർത്തിയിരുന്നതായും ആരോഗ്യമന്ത്രി കെ.കെ.ശൈലജ ടീച്ചർ പറഞ്ഞു. ഇതിനിടെ, ആശങ്കപ്പെടേണ്ട കാര്യമില്ലെന്നും ഇദ്ദേഹവുമായി സമ്പർക്കം പുലർത്തിയ എല്ലാവരെയും ക്വറന്റൈൻ ചെയ്തിട്ടുണ്ടെന്നും മാഹി എം.എൽ.എ ഡോ.സി.രാമചന്ദ്രൻ അറിയിച്ചു.
നേരിട്ട് ഇടപഴകിയ 26 പേരുടെ സ്രവം പരിശോധിച്ചു. എന്നാൽ ആർക്കും രോഗം കണ്ടെത്താനായില്ല. കണ്ണൂരിൽ ഇതുവരെ 65 പേർക്കാണ് കൊവിഡ് രോഗം സ്ഥിരീകരിച്ചത്. 33 പേർക്ക് രോഗം ഭേദമായിട്ടുണ്ട്.
മാര്ച്ച് 15 മുതല് മാര്ച്ച് 22 വരെ മാഹിയിലെയും തലശ്ശേരിയിലെയും വിവിധ ഭാഗങ്ങളില് വിവാഹം, മതചടങ്ങുകള് ഉള്പ്പെടെ നിരവധി പരിപാടികളില് ഇയാള് പങ്കെടുത്തിട്ടുണ്ട്. പ്രാഥമിക സമ്പര്ക്കത്തില് ഉള്പ്പെട്ടവരെ ഇതിനകം ഐസൊലേഷനിലേക്ക് മാറ്റിയിട്ടുണ്ട്.. ഏതെങ്കിലും തരത്തില് ഇയാളുമായി ബന്ധപ്പെട്ടവര് അടുത്ത ആരോഗ്യകേന്ദ്രവുമായി ബന്ധപ്പെടണമെന്ന് കലക്ടര് അറിയിച്ചു.
പന്ന്യന്നൂർ,ചമ്പാട് തുടങ്ങിയ പ്രദേശങ്ങളിലെ ചില വിവാഹ നിശ്ചയ ചടങ്ങുകളിൽ ഇയാൾ പങ്കെടുത്തതായി വിവരം ലഭിച്ചിട്ടുണ്ട്.
ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക.