July 13, 2020
July 13, 2020
റഈസ് അഹമ്മദ്
ദോഹ: ക്വാറന്റൈന്‍ വാസം പൂര്‍ത്തിയാക്കി ആരോഗ്യ വകുപ്പ് വീട്ടിലേക്ക് മടങ്ങാന്‍ നിര്‍ദ്ദേശിച്ച ഖത്തറില്‍ നിന്നുള്ള പ്രവാസിക്ക് കോവിഡ്-19 സ്ഥിരീകരിച്ചു. തൃശൂര്‍ ദേശമംഗലം തലശേരി സ്വദേശി നൗഷാദിനെ കോവിഡ് സ്ഥിരീകരിച്ചതിനെ തുടര്‍ന്ന് തൃശൂര്‍ മെഡിക്കല്‍ കേളെജിലേക്ക് മാറ്റി. വീട്ടിലേക്ക് അയക്കുന്നതിന് മുമ്പ് കോവിഡ് ടെസ്റ്റ് ചെയ്യണമെന്ന് യുവാവ് നിര്‍ബന്ധം പിടിച്ചതിനെ തുടര്‍ന്നാണ് ആരോഗ്യ വകുപ്പ് പരിശോധന നടത്താന്‍ തയ്യാറായത്.
രോഗ ലക്ഷണങ്ങളൊന്നും പ്രകടമല്ലാത്തതിനാല്‍ കോവിഡ് ടെസ്റ്റ് ആവശ്യമില്ലെന്ന നിലപാടിലായിരുന്നു ആരോഗ്യവകുപ്പ്. എന്നാല്‍ പ്രായമായ പിതാവും കുട്ടികളുമുള്ള വീട്ടിലേക്ക് തിരിക്കുന്നതിന് മുമ്പ് ടെസ്റ്റ് ചെയ്ത് കോവിഡ് നെഗറ്റീവാണെന്ന് ഉറപ്പാക്കണമെന്ന് നൗഷാദ് ആവശ്യപ്പെടുകയായിരുന്നു. തന്റെ ആവശ്യം അംഗീകരിക്കാനും പരിശോധന നടത്താനും ആരോഗ്യവകുപ്പ് തുടക്കത്തില്‍ തയ്യാറായിരുന്നില്ലെന്ന് തൃശൂര്‍ മെഡിക്കല്‍ കോളെജില്‍ കഴിയുന്ന നൗഷാദ് ന്യൂസ് റൂമിനോട് പറഞ്ഞു. വീട്ടിലേക്ക് മടങ്ങണമെങ്കില്‍ ടെസ്റ്റ് ചെയ്യണമെന്ന നൗഷാദിന്റെ നിര്‍ബന്ധത്തിന് ഒടുവില്‍ ആരോഗ്യ വകുപ്പ് ഉദ്യോഗസ്ഥര്‍ വഴങ്ങുകയായിരുന്നു. ഖത്തറിലെ മൈഥറില്‍ ജോലി ചെയ്യുന്ന നൗഷാദ് രണ്ടാഴ്ച മുമ്പാണ് വന്ദേ ഭാരത് മിഷന്‍ വിമാനത്തില്‍ ദോഹയില്‍ നിന്നും നെടുമ്പാശ്ശേരി വഴി നാട്ടിലേക്ക് മടങ്ങിയത്.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക
