November 12, 2019
November 12, 2019
ദോഹ: അല്വക്ര, ഉമ്മു സലാല്, സൈലിയ്യ എന്നിവിടങ്ങളില് ഈ വര്ഷാവസാനത്തോടെ ലേല മൈതാനങ്ങളോടു കൂടിയ സെന്ട്രല് മാര്ക്കറ്റുകള് തുറക്കും. രണ്ടാമത് ഭക്ഷ്യ സുരക്ഷാ സമ്മേളനത്തിന്റെ പ്രഖ്യാപനത്തിനായി വിളിച്ചുചേര്ത്ത വാര്ത്താ സമ്മേളനത്തിനിടെയാണ് ഹസ്സാദ് ഫുഡിലെ ബിസിനസ് റിലേഷന്സ് ഡയരക്ടര് മുബാറക് അല്സഹൂത്തി ഇക്കാര്യം അറിയിച്ചത്.
മൊത്ത വിപണിയോടൊപ്പം സമ്മിശ്രമായ കച്ചവടവും മാര്ക്കറ്റിലുണ്ടാകും. അല്വക്ര സെന്ട്രല് മാര്ക്കറ്റില് കന്നുകാലി മൊത്ത കച്ചവടമുണ്ടാകും. പഴം, പച്ചക്കറി മൊത്ത വിപണിയായിരിക്കും അല്സൈലിയ്യയിലുണ്ടാകുക. മത്സ്യ മൊത്ത വിപണിയായിരിക്കും ഉമ്മു സലാല് സെന്ട്രല് മാര്ക്കറ്റ്. ഹസ്സാദ് ഫുഡിന്റെ അനുബന്ധ വിഭാഗമായ അസ്വാഖ് മൂന്നു മാര്ക്കറ്റുകളിലും പ്രവര്ത്തിക്കുമെന്ന് മുബാറക് അല്സഹൂത്തി അറിയിച്ചു.
ഈ മാസം 26ന് ദോഹയിലെ ദാറുല് അറബില് വച്ചാണ് രണ്ടാമത് ഭക്ഷ്യ സുരക്ഷാ സമ്മേളനം നടക്കുന്നത്. നഗരസഭ, പരിസ്ഥിതി മന്ത്രി എന്ജിനീയര് അബ്ദുല്ല ബിന് അബ്ദുല് അസീസ് ബിന് തുര്ക്കി അല്സുബാഇയാണ് സമ്മേളനത്തിന്റെ രക്ഷാധികാരി. വാര്ത്താ സമ്മേളനത്തില് ഭക്ഷ്യ സുരക്ഷാ വകുപ്പ് ഡയരക്ടര് മസ്ഊദ് ജാറല്ല അല്മഅര്റി സംസാരിച്ചു. പ്രാദേശിക പച്ചക്കറി ഉല്പാദനം 24 ശതമാനത്തില്നിന്ന് 28 ശതമാനമായി ഉയര്ന്നതായി അദ്ദേഹം സൂചിപ്പിച്ചു.