July 19, 2021
July 19, 2021
മക്ക: ഇന്ന് അറഫാ ദിനം. ഹജ്ജ് കര്മത്തിലെ അതിപ്രധാന ചടങ്ങായ അറഫ സംഗമം ഇന്ന് നടക്കും. മഹാമാരിക്കാലത്തെ രണ്ടാമത്തെ ഹജ്ജിന് നിയന്ത്രിതരായ ആളുകള്ക്ക് മാത്രമേ അനുവാദം ലഭിച്ചിട്ടുള്ളൂവെങ്കിലും ലോകത്തെ മുഴുവന് വിശ്വാസികളും അറഫാ സംഗമത്തെ സാകൂതം കാത്തിരിക്കയാണ്. അറഫ പ്രസംഗം പത്തു ഭാഷകളിലേക്ക് പരിഭാഷപ്പെടുത്തും. രണ്ടു വര്ഷം മുമ്പാണ് അറഫ പ്രസംഗം തത്സമയം പരിഭാഷപ്പെടുത്തല് ആരംഭിച്ചത്. ആദ്യവര്ഷത്തില് അറബി ഭാഷക്കു പുറമേ ഇംഗ്ലീഷ്, ഫ്രഞ്ച്, പേര്ഷ്യന്, മലായ്, ഉര്ദു എന്നീ ഭാഷകളിലായിരുന്നു. രണ്ടാം വര്ഷത്തില് ചൈനീസ് ഭാഷയുംകൂടി ചേര്ത്തു. ഈ വര്ഷം തുര്ക്കി, റഷ്യന്, ഹുസാവിയ, ബംഗാളി എന്നീ ഭാഷകളില് കൂടി പരിഭാഷയുണ്ടാകും.ഇതോടെ മൊത്തം ഭാഷകളുടെ എണ്ണം പത്താകും. വിവിധ ടി.വി ചാനലുകള്, എഫ്.എം ഫ്രീക്വന്സികള്, സ്മാര്ട്ട് ആപ്ലിക്കേഷനുകള് (അറഫാത്ത് ആപ്ലിക്കേഷന്, ഹറമൈന് ആപ്ലിക്കേഷന്, മനാറത് അല്ഹറമൈന് ആപ്ലിക്കേഷന്) എന്നിവ വഴി അറഫ പ്രഭാഷണം കേള്ക്കാനാകും. പരിഭാഷാ പദ്ധതിയുടെ ഗുണഭോക്താക്കളുടെ എണ്ണം മൂന്നര കോടിയിലധികം എത്തിയതായി ഭാഷ, വിവര്ത്തന വിഭാഗം മേധാവി മശാരി അല്മസ്ഊദി പറഞ്ഞു. മക്ക ഹറം പള്ളിയിലെ ഇമാം ഡോ.ബന്ദര് ബിന് അബ്ദുല് അസീസാണ് അറഫ പ്രഭാഷണം നടത്തുക.അറഫയിലെ മസ്ജിദുന്നമിറയില് വച്ചാണ് പ്രഭാഷണം ഉണ്ടാവുക.അറുപതിനായിരം പേരാണ് ഇത്തവണ ഹജ്ജിനെത്തിയിട്ടുള്ളത്. കര്ശനമായ കൊവിഡ് പ്രോട്ടോകാള് പാലിച്ചുകൊണ്ടാണ് ഇത്തവണത്തെ ഹജ്ജ് കര്മങ്ങള് നടക്കുന്നത്.അറഫ ദിനത്തിലാണ് കഅബയെ പുതിയ കിസ് വ പുതപ്പിക്കുന്ന ചടങ്ങ് നടക്കുക. അതിനുള്ള ഒരുക്കങ്ങളും പൂര്ത്തിയായിട്ടുണ്ട്.