September 19, 2019
September 19, 2019
സന്‍ആ: സൗദിക്ക് പിന്നാലെ യു.എ.ഇയെയും ആക്രമിക്കുമെന്ന മുന്നറിയിപ്പുമായി യമനിലെ വിമത വിഭാഗമായ ഹൂതികള്‍. യു.എ.ഇയിലെ നിരവധി സ്ഥലങ്ങള്‍ തങ്ങള്‍ ലക്ഷ്യമിട്ടു കഴിഞ്ഞിട്ടുണ്ടെന്നും ഹൂതികള്‍ അറിയിച്ചു. സൗദി അരാംകോ പ്ലാന്റുകള്‍ക്കു നേരെയുണ്ടായ ഡ്രോണ്‍ ആക്രമണത്തിനു പിറകെയാണ് യു.എ.ഇക്കു നേരെയും പടയൊരുക്കം ആരംഭിച്ചതായി ഹൂതികളുടെ മുന്നറിയിപ്പ്.
ഒരൊറ്റ നടപടി തന്നെ നിങ്ങള്‍ക്ക് അത്യാവശ്യത്തിനു മതിയാകുമെന്ന് യു.എ.ഇ ഭരണകൂടത്തെ അറിയിക്കുകയാണെന്ന് ഹൂതി സൈനിക വക്താവ് യഹ്‌യ സാരിയ ടെലിവിഷനിലൂടെ സംപ്രേഷണം ചെയ്ത പ്രസംഗത്തില്‍ വ്യക്തമാക്കി. യു.എ.ഇയില്‍ നിരവധി കേന്ദ്രങ്ങള്‍ തങ്ങളുടെ ലക്ഷ്യമാണെന്ന് ഇതാദ്യമായി പ്രഖ്യാപിക്കുകയാണ്. ഇതില്‍ ചിലത് അബൂദബിയിലാണ്. ഏതു സമയവും ഇവയ്ക്കു നേരെ ആക്രമണമുണ്ടാകാം-പ്രസംഗത്തില്‍ വക്താവ് മുന്നറിയിപ്പ് നല്‍കി.റോയിട്ടേഴ്‌സാണ് ഇക്കാര്യം റിപ്പോർട്ട് ചെയ്തത്.
ജെറ്റ് എന്‍ജിനുകളുടെ സഹായത്തോടെ പ്രവര്‍ത്തിക്കുന്ന പുതിയ ഡ്രോണുകള്‍ തങ്ങളുടെ പക്കലുണ്ടെന്നും യഹ്‌യ സാരിയ വെളിപ്പെടുത്തി. സൗദിയുടെ ഉള്‍പ്രദേശങ്ങളില്‍ വരെ എത്താന്‍ ശേഷിയുള്ളതാണ് ഇവയെന്നും സാരിയ സൂചിപ്പിച്ചു.
