September 27, 2019
September 27, 2019
ന്യൂയോർക്ക്: സൗദി അരാംകൊ ആക്രമണത്തിൽ തങ്ങൾക്കെതിരെ ആരോപണം ഉന്നയിക്കുന്നവരോട് തെളിവ് ഹാജരാക്കാൻ ആവശ്യപ്പെട്ട് ഇറാൻ. ന്യൂയോർക്കിൽ മാധ്യമപ്രവർത്തകരോട് സംസാരിക്കവെ ഇറാൻ പ്രസിഡന്റ് ഹസൻ റൂഹാനിയാണ് ഇക്കാര്യം ആവശ്യപ്പെട്ടത്.
ഇറാനെതിരെ ആരോപണം ഉന്നയിക്കുന്നവർ മതിയായ തെളിവുകൾ കൊണ്ടുവരട്ടെ. ഇത്തരത്തിൽ ആരോപണം ഉന്നയിക്കാൻ നിങ്ങളുടെ പക്കൽ എന്തു തെളിവാണ് ഉള്ളത്-റൂഹാനി ചോദിച്ചു. തങ്ങൾക്കെതിരെ പരമാവധി സമ്മർദം എന്ന നയം അമേരിക്ക അവസാനിപ്പിക്കണമെന്നും അദ്ദേഹം ആവശ്യപ്പെട്ടു. സമ്മർദനയം ഉപേക്ഷിച്ച് ചർച്ചയുടെയും യുക്തിയുടെയും മാർഗം തിരഞ്ഞെടുക്കാൻ യുഎസ് തയാറാകണമെന്നും റൂഹാനി വ്യക്തമാക്കി.
ആക്രമണത്തിൽ ഇറാനെതിരെ ആരോപണവുമായി കൂടുതൽ യൂറോപ്യൻ രാജ്യങ്ങൾ കഴിഞ്ഞ ദിവസം രംഗത്തെത്തിയിരുന്നു. ബ്രിട്ടൻ, ഫ്രാൻസ്, ജർമനി എന്നീ രാജ്യങ്ങളാണ് ഏറ്റവുമൊടുവിൽ ആക്രമണത്തിൽ ഇറാന് പങ്കുണ്ടെന്ന് ആരോപിച്ചത്.നേരത്തെ അമേരിക്കയും സൗദിയും യുഎഇയും ആക്രമണത്തിൽ ഇറാനെ കുറ്റപ്പെടുത്തി രംഗത്തെത്തിയിരുന്നു.ഈ പശ്ചാത്തലത്തിലാണ് ഇറാൻ പ്രസിഡന്റ് തെളിവുകൾ കൊണ്ടുവരാൻ ആവശ്യപ്പെട്ടത്.
