July 15, 2021
July 15, 2021
ജനീവ: കൊവിഡ് മഹാമാരിയുടെ മൂന്നാം തരംഗം ആരംഭിച്ചതായി ലോകാരോഗ്യ സംഘടന (WHO). മൂന്നാം തരംഗത്തിന്റെ പ്രാരംഭ ഘട്ടത്തിലൂടെയാണ് കടന്നുപോകുന്നതെന്ന് ലോകാരോഗ്യ സംഘടന മേധാവി (WHO Chief) ട്രെഡ്രോസ് അഥനോം ഗെബ്രിയേസസ് പറഞ്ഞു.
കൊവിഡിന്റെ ഡെല്‍റ്റ വകഭേദം (Delta Variant) ആഗോളതലത്തില്‍ വ്യാപകമായിരിക്കുന്ന പശ്ചാത്തലത്തിലാണ് ലോകാരോഗ്യ സംഘടന മൂന്നാംതരംഗത്തെക്കുറിച്ച്‌ വ്യക്തമാക്കിയിരിക്കുന്നത്. മൂന്നാംതരംഗത്തിന്റെ പ്രാരംഭ ഘട്ടത്തിലൂടെയാണ് കടന്ന് പോകുന്നത്. ഡെല്‍റ്റ വകഭേദം 11 രാജ്യങ്ങളില്‍ കണ്ടെത്തിയിട്ടുണ്ട്. ഇത് ലോകം മുഴുവൻ വ്യാപിക്കുമെന്നാണ് നിഗമനം. അല്ലെങ്കില്‍ മൂന്നാം തരംഗം ആരംഭിച്ച്‌ കഴിഞ്ഞുവെന്നും ഇന്റര്‍നാഷണല്‍ ഹെല്‍ത്ത് റെഗുലേഷന്‍സിന്റെ അടിയന്തര സമിതിയെ അഭിസംബോധന ചെയ്തുകൊണ്ട് ടെഡ്രോസ് അഥനോം ഗെബ്രിയേസസ് പറഞ്ഞു.
കൂടുതല്‍ വ്യാപന ശേഷിയുള്ള വകഭേദങ്ങള്‍ ഉണ്ടാകാം. യൂറോപ്പിലും വടക്കന്‍ അമേരിക്കയിലും പ്രതിരോധ കുത്തിവയ്പ്പ് നിരക്ക് ഉയര്‍ത്തിയത് കൊവിഡ് കേസുകളും മരണങ്ങളും കുറയുന്നതിന് കാരണമായെന്നും ലോകാരോഗ്യ സംഘടന വ്യക്തമാക്കി. എന്നാല്‍ ആഗോള തലത്തില്‍ കൊവിഡ് കേസുകള്‍ വീണ്ടും വര്‍ധിക്കുകയാണ്. കൊവിഡ് വാക്സിന്റെ കാര്യത്തില്‍ ആഗോളതലത്തില്‍ വലിയ അസമത്വം നിലനില്‍ക്കുന്നതായും അദ്ദേഹം പറഞ്ഞു.
