January 19, 2021
January 19, 2021
ദോഹ: കൊവിഡ്-19 പ്രതിരോധ വാക്‌സിന്‍ സ്വീകരിച്ചതിന്റെ തെളിവായി ലഭിക്കുന്ന സര്‍ട്ടിഫിക്കറ്റ് അന്താരാഷ്ട്ര യാത്രകള്‍ക്കുള്ള പുതിയ മാനദണ്ഡമായേക്കാമെന്ന് ഖത്തര്‍ എയര്‍വെയ്‌സ് ഗ്രൂപ്പ് സി.ഇ.ഒ അക്ബര്‍ അല്‍ ബക്കര്‍. ലോകത്തെ വിവിധ രാജ്യങ്ങളിലേക്ക് പ്രവേശിക്കാനായി വാക്‌സിന്‍ സ്വീകരിച്ചതിന്റെ സര്‍ട്ടിഫിക്കറ്റ് ആവശ്യപ്പെട്ടേക്കാമെന്നും ഖത്തർ എയർവെയ്സ് ട്വിറ്ററിൽ പോസ്റ്റ് ചെയ്ത വീഡിയോയിൽ അദ്ദേഹം പറഞ്ഞു.
'വിമാനത്തില്‍ കയറാനായി എല്ലാവരും ഹാജരാക്കേണ്ട പുതിയ മാനദണ്ഡമാണ് വാക്‌സിനേഷന്‍ സര്‍ട്ടിഫിക്കറ്റ് എന്ന് ഞാന്‍ കരുതുന്നു. വിമാനത്തില്‍ കയറാന്‍ മാത്രമല്ല, രാജ്യങ്ങളിലേക്ക് പ്രവേശിക്കുന്നതിനു മുമ്പ് നിങ്ങള്‍ നിര്‍ബന്ധമായും വാക്‌സിന്‍ സ്വീകരിച്ചിരിക്കണമെന്ന് അവര്‍ ആവശ്യപ്പെട്ടേക്കാം. ഐ.സി.എ.ഒ, ഐ.എ.ടി.എ, ഡബ്ല്യു.എച്ച്.ഒ എന്നിവരുടെ സംയുക്ത പദ്ധതിയിലൂടെ ജനങ്ങളുടെ വാക്‌സിനേഷന്‍ സര്‍ട്ടിഫിക്കറ്റ് അന്താരാഷ്ട്രതലത്തില്‍ അംഗീകരിക്കുന്നതിനായി 'സുരക്ഷാ പാസ്' അവതരിപ്പിക്കുമെന്നാണ് ഞാന്‍ കരുതുന്നത്.' -അല്‍ ബക്കര്‍ പറഞ്ഞു.
രോഗത്തെ കുറിച്ചും വാക്‌സിനേഷന്റെ ഫലത്തെ കുറിച്ചുമുള്ള ജനങ്ങളുടെ ചോദ്യങ്ങള്‍ക്ക് ശാസ്ത്രം തെളിവുകളോടെ ഉത്തരങ്ങള്‍ നല്‍കുന്നതുവരെ യാത്രകള്‍ 2019 ലെ പോലെയാകില്ലെന്നാണ് താന്‍ കരുതുന്നതെന്നും അദ്ദേഹം പറഞ്ഞു.
'ഈ മഹാമാരിയില്‍ നിന്ന് ഞങ്ങളുടെ യാത്രക്കാരെയും ജീവനക്കാരെയും സംരക്ഷിക്കുന്നതിനെക്കാള്‍ വിലയേറിയതായി മറ്റൊന്നും ഇല്ല. ഞങ്ങള്‍ അവരെ പരിപാലിക്കുകയും ഖത്തര്‍ എയര്‍വെയ്‌സില്‍ യാത്ര ചെയ്യാനുള്ള ആത്മവിശ്വാസം നല്‍കുകയും ചെയ്യാനായി ഞങ്ങള്‍ പരിശ്രമിക്കുന്നു.' -അദ്ദേഹം കൂട്ടിച്ചേര്‍ത്തു.
ന്യൂസ് റൂം വാർത്തകൾ ഫേസ്ബുക്കിൽ ലഭിക്കാനായി ഇവിടെ ക്ലിക്ക് ചെയ്ത് പേജ് ലൈക്ക് ചെയ്യൂ.
ന്യൂസ് റൂം വാര്‍ത്തകള്‍ ടെലിഗ്രാമില്‍ മുടങ്ങാതെ ലഭിക്കാനായി ഇവിടെ ക്ലിക്ക് ചെയ്യൂ.
ന്യൂസ് റൂം വാര്‍ത്തകള്‍ വാട്ട്‌സ്ആപ്പില്‍ മുടങ്ങാതെ ലഭിക്കാനായി ഇവിടെ ക്ലിക്ക് ചെയ്ത് മെസേജ് അയക്കൂ.
