January 19, 2021
January 19, 2021
വാഷിങ്ടണ്‍: വിശിഷ്ട പൊതുസേവനത്തിനുള്ള യു.എസിന്റെ ഉന്നത ബഹുമതിക്ക് ഖത്തര്‍ വിദേശകാര്യ മന്ത്രിയും ഉപ പ്രധാനമന്ത്രിയുമായ ശൈഖ് മുഹമ്മദ് ബിന്‍ അബ്ദുല്‍റഹ്മാന്‍ അല്‍താനിക്ക്. യു.എസ് ഉദ്യോഗസ്ഥര്‍ക്കും സൗഹൃദ രാജ്യങ്ങളിലെ ഉദ്യോഗസ്ഥര്‍ക്കും അമേരിക്കന്‍ പ്രതിരോധ വകുപ്പ് നല്‍കുന്ന ഓണററി ബഹുമതിയാണ് ഇത്.
യു.എസ് ദേശീയ സുരക്ഷാ ഉപദേഷ്ടാവ് റോബര്‍ട്ട് ഒബ്രിയാന്‍ അമേരിക്കയിലെ ഖത്തര്‍ അംബാസഡര്‍ ശൈഖ് മെഷാല്‍ ബിന്‍ ഹമദ് അല്‍താനിക്ക് ബഹുമതി സമ്മാനിച്ചു.
ഖത്തറും അമേരിക്കയും തമ്മിലുള്ള ബന്ധം ശക്തിപ്പെടുത്താനായി മുഹമ്മദ് ബിന്‍ അബ്ദുല്‍റഹ്മാന്‍ അല്‍താനി നടത്തുന്ന നയതന്ത്രപരമായ പരിശ്രമങ്ങളും അമേരിക്കയുമായി വിവിധ മേഖലകളില്‍ സഹകരിക്കുന്നതിലുള്ള പ്രതിജ്ഞാബദ്ധതയും അംഗീകരിച്ചാണ് അദ്ദേഹത്തിന് ഈ ഉന്നത ബഹുമതി നല്‍കുന്നതെന്ന് യു.എസ് പ്രതിരോധ വകുപ്പ് പറഞ്ഞു. ഖത്തറിന്റെ പ്രധാന സഖ്യകക്ഷി എന്ന നിലയില്‍ അമേരിക്കയ്ക്കുള്ള അദ്ദേഹത്തിന്റെ പിന്തുണ പങ്കാളിത്തത്തിന് പുതിയ അവസരങ്ങള്‍ സൃഷ്ടിച്ചതായും യു.എസ് പ്രതിരോധ വകുപ്പ് പറഞ്ഞു.
ശൈഖ് മുഹമ്മദ് ബിന്‍ അബ്ദുല്‍റഹ്മാന്‍ അല്‍താനി
അഫ്ഗാനിസ്ഥാനിലെ സമാധാനത്തിനായുള്ള അദ്ദേഹത്തിന്റെ പരിശ്രമങ്ങളെയും അതിലുണ്ടാക്കിയ മുന്നേറ്റത്തെയും യു.എസ് പ്രതിരോധ വകുപ്പ് അഭിനന്ദിച്ചു. അമേരിക്കയും താലിബാനും തമ്മില്‍ 2020 ഫെബ്രുവരി 29 ന് കരാറില്‍ ഒപ്പു വച്ചതും അഫ്ഗാന്‍ സര്‍ക്കാറും താലിബാനും തമ്മിലുള്ള സമാധാന ചര്‍ച്ചകള്‍ സെപ്റ്റംബര്‍ 12 ന് ദോഹയില്‍ ആരംഭിച്ചതും ഉള്‍പ്പെടെയുള്ള കാര്യങ്ങളില്‍ അദ്ദേഹം വഹിച്ച പങ്ക് സുപ്രധാനമാണ്. ശൈഖ് മുഹമ്മദ് ബിന്‍ അബ്ദുല്‍റഹ്മാന്‍ അല്‍താനിയുടെ നയതന്ത്രപരമായ നേതൃത്വമാണ് ദശകങ്ങളായി അസ്വസ്ഥത അനുഭവിക്കുന്ന അഫ്ഗാനിസ്ഥാനിലെ സമാധാന ശ്രമങ്ങളെ ഇത്രയേറെ മുന്നോട്ട് നയിച്ചതെന്ന് യു.എസ് പ്രതിരോധ വകുപ്പ് എടുത്ത് പറഞ്ഞു.
ഗള്‍ഫ് മേഖലയിലെ സ്ഥിരതയും അഭിവൃദ്ധിയും പ്രോത്സാഹിപ്പിക്കാനും ഗള്‍ഫ് പ്രതിസന്ധി പരിഹരിക്കാനും ഖത്തര്‍ ഉപ പ്രധാനമന്ത്രി നിരന്തരമായ ശ്രമങ്ങള്‍ നടത്തിയെന്നും യു.എസ് പ്രതിരോധ വകുപ്പ് കൂട്ടിച്ചേര്‍ത്തു.
1947 മുതലാണ് അമേരിക്കന്‍ പ്രതിരോധ വകുപ്പ് ഈ ബഹുമതി നല്‍കിത്തുടങ്ങിയത്. മുന്‍ അമേരിക്കന്‍ പ്രസിഡന്റുമാരായ ബരാക് ഒബാമ, ജോര്‍ജ്ജ് ഡബ്ല്യു. ബുഷ്, ബില്‍ ക്ലിന്റണ്‍ തുടങ്ങി നിരവധി പ്രമുഖര്‍ക്ക് ഈ ബഹുമതി ലഭിച്ചിട്ടുണ്ട്.
ന്യൂസ് റൂം വാർത്തകൾ ഫേസ്ബുക്കിൽ ലഭിക്കാനായി ഇവിടെ ക്ലിക്ക് ചെയ്ത് പേജ് ലൈക്ക് ചെയ്യൂ.
ന്യൂസ് റൂം വാര്‍ത്തകള്‍ ടെലിഗ്രാമില്‍ മുടങ്ങാതെ ലഭിക്കാനായി ഇവിടെ ക്ലിക്ക് ചെയ്യൂ.
ന്യൂസ് റൂം വാര്‍ത്തകള്‍ വാട്ട്‌സ്ആപ്പില്‍ മുടങ്ങാതെ ലഭിക്കാനായി ഇവിടെ ക്ലിക്ക് ചെയ്ത് മെസേജ് അയക്കൂ.
