November 03, 2019
November 03, 2019
ദുബായ് : രൂപപ്പെട്ട 'മഹ' ചുഴലി ഗൾഫ് തീരത്തേക്ക് നീങ്ങുന്നതിന്റെ മുന്നോടിയായി യു.എ.ഇ കിഴക്കൻ തീരങ്ങളിൽ ജാഗ്രതാ നിർദേശം. ഖൽബ,ഖോർഫുഖാൻ,ഫുജൈറ,ദിബ്ബ തീരങ്ങളിലാണ് 'മഹ'യുടെ ആഘാതം അനുഭവപ്പെടുക. അടുത്ത 24 മണിക്കൂറിനകം ചുഴലിക്കൊടുങ്കാറ്റ് കിഴക്കൻ എമിറേറ്റിന്റെ തീരങ്ങളിൽ എത്തുമെന്നും കാറ്റഗറി 2 ൽ പെട്ട ചുഴലിക്കൊടുങ്കാറ്റായി മാറുമെന്നുമാണ് മുന്നറിയിപ്പ്. മണിക്കൂറിൽ 160 മുതൽ 170 കിലോമീറ്റർ വരെയായിരിയ്ക്കും മധ്യഭാഗത്തെ കാറ്റിന്റെ വേഗം. ഇതേതുടർന്ന് കിഴക്കൻ എമിറേറ്റുകളിൽ ശക്തമായ കൊടുങ്കാറ്റ് അനുഭവപ്പെടുമെന്നും കടലിൽ തിരമാലകൾ ഉയർന്നുപൊങ്ങുമെന്നും യു.എ.ഇ ദേശീയ ദുരന്ത നിവാരണ സമിതി (NCEMA) മുന്നറിയിപ്പ് നൽകി.
വീടുകളുടെ ജനവാതിലുകളും വാതിലുകളും ഭദ്രമായി അടക്കുകയും കുട്ടികളെ പുറത്ത് കളിക്കാൻ അനുവദിക്കരുതെന്നും എൻ.സി.ഇ.എം.എ ട്വിറ്ററിൽ ജനങ്ങൾക്ക് നിർദേശം നൽകി. ഇന്ന് (ഞായർ) രാത്രിയോടെ ചുഴലിക്കൊടുങ്കാറ്റ് കിഴക്കൻ എമിറേറ്റുകളിൽ എത്തുമെന്നും താഴ്ന്ന പ്രദേശങ്ങളിൽ കടലേറ്റവും വെള്ളപ്പൊക്കവും ഉണ്ടാകാൻ ഇടയുണ്ടെന്നും കാലാവസ്ഥാ കേന്ദ്രം അറിയിച്ചു.