January 30, 2020
January 30, 2020
ന്യൂഡൽഹി : പൗരത്വനിയമ ഭേദഗതിക്കെതിരെ ജാമിയ മില്ലിയ സര്‍വകലാശാലയിലെ വിദ്യാര്‍ഥികള്‍ രാജ്ഘട്ടിലേക്ക് നടത്തിയ ലോങ് മാര്‍ച്ചിന് നേരെ വെടിവെപ്പ്. വെടിവെപ്പില്‍ ഒരു വിദ്യാര്‍ഥിക്ക് പരിക്കേറ്റു. സിവില്‍ വേഷത്തിലെത്തിയ ആളാണ് പ്രതിഷേധമാര്‍ച്ചിന് നേരെ വെടിവച്ചത്. ഇയാളെ പൊലീസ് കസ്റ്റഡിയിലെടുത്തതായാണ് റിപ്പോര്‍ട്ടുകള്‍.
വെടിവെപ്പില്‍ പരിക്കേറ്റത് ജാമിയ മിലിയയിലെ ഷബാബ് എന്ന വിദ്യാര്‍ത്ഥിക്കാണ് എന്നാണ് പുറത്തു വരുന്ന വിവരം. കൈയില്‍ ചോരയൊലിച്ചു നില്‍ക്കുകയായിരുന്ന ഷദാബിനെ വിദ്യാര്‍ത്ഥികള്‍ ചേര്‍ന്ന് ദില്ലി എയിംസില്‍ എത്തിച്ചിട്ടുണ്ട്. വെടിവച്ച ആൾ കസ്റ്റഡിയിലുണ്ടെന്നും സംഭവത്തില്‍ അന്വേഷണം ആരംഭിച്ചിട്ടുണ്ടെന്നും ദില്ലി സൗത്ത് ഈസ്റ്റ് ഡിസിപി അറിയിച്ചു. വെടിവെപ്പിന് പിന്നാലെ പ്രദേശത്തെ റോഡുകളിലൂടെയുള്ള ഗതാഗതം പൊലീസ് തടഞ്ഞു.
