December 05, 2019
December 05, 2019
ദോഹ : അറേബ്യൻ ഗൾഫ് കപ്പ് സെമി ഫൈനലിൽ ഖത്തർ ഇന്ന് സൗദി അറേബ്യയെ നേരിടും. രാത്രി എട്ടിന് വക്രയിലെ അൽ ജുനൂബ് സ്റ്റേഡിയത്തിലാണ് നിർണായക മത്സരം. ആദ്യ മത്സരത്തിൽ ബഹ്റൈൻ ഇറാഖിനെ നേരിടും. വൈകീട്ട് 5 മണിക്ക് അബ്ദുല്ലാ ബിൻ ഖലീഫാ സ്റ്റേഡിയത്തിലാണ് ഈ മത്സരം നടക്കുക. രണ്ടു മത്സരങ്ങളിലും ജയിക്കുന്ന ടീമുകൾ തമ്മിലാണ് ഈ മാസം എട്ടിന് നടക്കുന്ന അന്തിമ പോരാട്ടത്തിൽ ഏറ്റുമുട്ടുക
കഴിഞ്ഞ ജനുവരിയിൽ അബുദാബിയിൽ നടന്ന ഏഷ്യാകപ്പിലാണ് അവസാനമായി ഖത്തറും സൗദിയും കളിക്കളത്തിൽ നേർക്കുനേർ എത്തിയത്. മത്സരത്തിൽ എതിരില്ലാത്ത രണ്ടു ഗോളുകൾക്ക് ഖത്തർ സൗദിയെ പരാജയപ്പെടുത്തിയിരുന്നു.മത്സരം കാണുന്നതിനുള്ള ടിക്കറ്റുകൾ 24 മണിക്കൂറിനുള്ളിൽ തന്നെ പൂർണമായും വിറ്റുപോയതായാണ് റിപ്പോർട്ട്.
മത്സരം കാണാൻ അൽ വക്രയിലേക്ക് ദോഹ മെട്രോയിൽ സൗജന്യ യാത്ര അനുവദിച്ചിട്ടുണ്ട്. മത്സരത്തിനുള്ള ടിക്കറ്റ് കൈവശമുള്ളവർക്കാണ് ഈ ആനുകൂല്യം ലഭിക്കുക. സെമി ഫൈനൽ നടക്കുന്നതിനാൽ ഇന്ന് അൽ വക്രയിൽ നിന്നുള്ള ദോഹ മെട്രോയുടെ മെട്രോ ലിങ്ക് സർവീസുകൾ റാസ് ബു ഫോന്റാസ് സ്റ്റേഷൻ വരെ സർവീസ് നടത്തും. അൽ വക്ര സ്റ്റേഷനിലെ വാഹനങ്ങളുടെ പാർക്കിങ് സമീപ പ്രദേശങ്ങളിലേക്ക് മാറ്റിയിട്ടുണ്ട്. രാത്രി 12 വരെയായിരിക്കും ഇന്നത്തെ മെട്രോ സർവീസ്.