May 17, 2020
May 17, 2020
ദോഹ : ഖത്തറിൽ നിന്നും കേരളത്തിലേക്ക് ചാർട്ടർ വിമാനത്തിന് അനുമതി തേടി ഖത്തർ കെഎംസിസി അധികൃതരുമായി ചർച്ച നടത്തി.ഖത്തറിൽ കുടുങ്ങിക്കിടക്കുന്ന മലയാളികളെ അടിയന്തരമായി നാട്ടിലെത്തിക്കാൻ ചാർട്ടർ വിമാനത്തിന് അനുമതി നൽകണമെന്നാണ് കെഎംസിസിയുടെ ആവശ്യം.നിലവിൽ ഖത്തർ എയർവേയ്‌സ്,ഇൻഡിഗോ ഉൾപ്പെടെയുള്ള വിമാനക്കമ്പനികൾ കേരളത്തിലേക്ക് ബുക്കിങ് തുടങ്ങിയിട്ടുണ്ടെങ്കിലും കേന്ദ്രാനുമതി ലഭിച്ചില്ലെങ്കിൽ പ്രവാസികളുടെ തിരിച്ചു പോക്കിന് ഇനിയും മാസങ്ങൾ വേണ്ടി വന്നേക്കും. വന്ദേഭാരത് മിഷൻ വഴി പരിമിതമായ സർവീസുകൾ മാത്രമാണ് കേരളത്തിലേക്കുള്ളത്.
ഈ സാഹചര്യത്തിലാണ് വിമാനം ചാർട്ടർ ചെയ്ത് ഖത്തറിലെ പ്രവാസി മലയാളികളെ നാട്ടിലെത്തിക്കാൻ കെ.എം.സി.സി നീക്കം തുടങ്ങിയത്. ഇതിനുള്ള പ്രാഥമിക ചർച്ചകൾ മാത്രമാണ് നടത്തിയത്. ഖത്തർ എയർവേയ്‌സ്,എയർ ഇന്ത്യ അധികൃതരുമായി ഇതുസംബന്ധിച്ച് ചർച്ചകൾ നടത്തിയതായും അനുമതി ലഭിച്ചാൽ സർവീസ് നടത്താൻ കഴിയുമെന്നാണ് പ്രതീക്ഷിക്കുന്നതെന്നും ബന്ധപ്പെട്ടവർ അറിയിച്ചു.ഇക്കാര്യം ആവശ്യപ്പെട്ട് പ്രധാനമന്ത്രി നരേന്ദ്ര മോദി ,കേന്ദ്ര വിദേശകാര്യ മന്ത്രി,കേന്ദ്രവ്യോമയാന മന്ത്രി,ഖത്തറിലെ ഇന്ത്യൻ സ്ഥാനപതി പി.കുമരൻ എന്നിവർക്ക് കത്തയച്ചതായും കെ.എം.സി.സി അറിയിച്ചു.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക
