November 30, 2020
November 30, 2020
ദോഹ: ഇന്ത്യന് എംബസിയുടെ വിവിധ സേവനങ്ങള് ജനങ്ങള്ക്ക് സൗകര്യപ്രദമായി എത്തിക്കാനായി പ്രത്യേക മൊബൈല് ആപ്ലിക്കേഷന് പുറത്തിറക്കുമെന്ന് ഇന്ത്യന് അംബാസഡര് ഡോ. ദീപക് മിത്തല് പറഞ്ഞു. ഞായറാഴ്ച വൈകുന്നേരം എംബസിയില് മാധ്യമപ്രവര്ത്തകരുമായി നടത്തിയ കൂടിക്കാഴ്ചയിലാണ് അദ്ദേഹം ഇക്കാര്യം അറിയിച്ചത്. നിലവില് എംബസി വെബ്സൈറ്റ് മുഖേന ആളുകള്ക്ക് അപ്പോയിന്റ്മെന്റുകള് എടുക്കാനും സേവനങ്ങള് തേടാനും സൗകര്യമുണ്ട്. അടിയന്തര ആവശ്യങ്ങള്ക്കായുള്ള അപ്പോയ്ന്മെന്റുകള്ക്ക് പ്രത്യേക സൗകര്യവും ഏര്പ്പെടുത്തിയിട്ടുണ്ട്.
ഇതിന് പുറമേയാണ് പ്രത്യേക മൊബൈല് ആപ്ലിക്കേഷന് കൂടി പുറത്തിറക്കുന്നതെന്നും അംബാസഡര് പറഞ്ഞു. ഇതുമായി ബന്ധപ്പെട്ട നടപടികള് പുരോഗമിക്കുകയാണ്. ഇന്ത്യയും ഖത്തറുമായി വിവിധ മേഖലകളില് സഹകരണം കൂടുതല് ശക് തിപ്പെടുകയാണ്. വ്യാപാരമേഖലയില് ഇന്ത്യയുടെ മുഖ്യപങ്കാളിയാണ് ഖത്തര്. ഖത്തറിൻറെ മൂന്നാമത് വലിയ വ്യാപാരപങ്കാളിയാണ് ഇന്ത്യ. അംബാസഡറായി ചുമതലയേറ്റെടുത്തതിനുശേഷം അമീര് ശൈഖ് തമീം ബിന് ഹമദ് ആല്ഥാനി, വിവിധ മന്ത്രിമാര്, വകുപ്പ് ഉദ്യോഗസ്ഥര് തുടങ്ങിയ നിരവധി പ്രമുഖരുമായി കൂടിക്കാഴ്ച നടത്തിയിട്ടുണ്ട്. വിവിധ മേഖലകളില് ഇന്ത്യയുമായി കൂടുതല് സഹകരണം ഉണ്ടാക്കാന് ഖത്തര് അധികൃതര് ഏറെ താല്പര്യം കാണിക്കുന്നതായും ഇന്ത്യൻ സ്ഥാനപതി പറഞ്ഞു.
ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക